MINISTRU PETRÓLEU NO MINERAIS HO EKIPA ANPM HALAO VIZITA SERVISUS BA PORTU BAIA TIBAR NO ASSISTI PROSESU HARAHUN MATERIAIS EXPLOSIVU IHA ARÉA KAITEHU.

Dili, Kinta-Feira, 6/Maiu/2021-Ministru Petróleu no Minerais, Dr. Victor da Conceição Soares, akompanha husi Vise Prezidente ANPM no ekipa Téknikus ANPM husi Diresaun Minerais no ekipa MPM, halao vizita ba iha Portu Baia Tibar, vizita refere hetan mos akompanhamentu husi parte PNTL liu husi unidade spesial EOD.Durante vizita husi Ministru Petróleu no Minerais ho komitiva husi ANPM no MPM iha sitiu Portu Baia Tibar ne’e, simu direitamente husi ekipa konsorsium Bolloré Africa Logistics no SDV East Timor ne’ebé mak forma Timor Port S.A (TPSA), mak servisu hamutuk EGT Engenharia halo supervizaun ba projetu refere, hamutuk ho China Harbour Timor Lda no Worley Parsons Australia hanesan jestor ba projetu, halo aprezentasaun kona-ba projetu ne’e, ba Ministru Petróleu no Minerais, Dr. Victor da Conceição Soares ho komitiva husi Vise Prezidente ANPM no ekipa Téknikus ANPM ho MPM, no membrus PNTL liu husi unidade spesial EOD, hodi akompanha no kumprende kona-ba lalaok no progresu servisus ba projetu Portu Baia Tibar ne’e.Ministériu Petróleu no Minerais, liu husi ninia Instituisaun tutelada ANPM, kontribui mos ba progresu konstrusaun Portu Baia Tibar, hodi fo Lisensa ambiental ba CHT ba Pedereira, Lisensa Mineiru ba CHT ba Quarry A, no Lisensa Mineiru ba CHT ba Quarry B.Alem vizita ba Portu Baia Tibar ne’e, objetivu prinsipal husi vizita Ministru Petróleu no Minerais, Dr. Victor da Conceição Soares ho komitiva ANPM no MPM ne’e, hodi ba assisti direitamente prosesu harahun materiais exploszivus iha aréa Kaitehu Liquisa, ne’ebé mak hetan assistensia husi ekipa PNTL Unidade spesial EOD servisu hamutuk ho ekipa husi China Harbour Timor Lda. Materiais explosivus ne’e mak durante ne’e utiliza ba apoia iha konstrusaun Portu Baia Tibar, tamba materiais explozivus hirak ne’e besik ona liu prazu, no tuir Lei proibidu atu rai nafatin iha armazen, tamba la seguru ba ema ninia vida, no mos prevene hodi utiliza sala hodi fo ameasas ba estabilidade nasaun nian.Hafoin finaliza prosesu harahun materiais explosivius hirak ne’e, ekipa husi Kompanhia China Harbour Timor Lda, entrega detonador hodi harahun materiais explosivus ne’e ba ekipa PNTL Unidade spesial EOD, liu husi Ministru Petróleu no Minerais, Dr. Victor da Conceição Soares, nu’udar Reprezentante husi Governu Timor-Leste. Detonador ne’e nu’udar apoiu ne’ebé mak Kompanhia ne’e entrega, hodi ajuda servisus PNTL Unidade Spesial EOD nian.@MÉDIA MPM@