MINISTRU PETRÓLEU NO MINERAIS PARTISIPA IHA DEBATE JENERALIDADE ORSAMENTU JÉRAL ESTADU 2021 BA LORON DAHULUK

Díli, Segunda-Feira, 30/Novembru/2020-Ministru Petroleu no Minerais, Dr. Victor da Conceição Soares, partisipa iha Debate Jeneralidade Orsamentu Jerál Estadu ba Tinan 2021 iha Uma Fukun Parlamentu Nasionál.Membrus VIII Governu konstitusional akompanha Sua Exélensia Primeiru Ministru RDTL, Taur Matan Ruak hodi halo aprezentasaun no diskursu iha debate Jeneralidade Orsamentu Jerál Estadu ba Tinan 2021 iha Plenaria Parlamentu Nasionál.Kompilasaun diskursu hosi Sua Exélensia Primeiru-Ministru Taur Matan Ruak nian iha debate OJE 2021.Despeza OJE 2021 nian orientadu ba buat 5 : Investe ita-nia rikusoin mina-rai nian iha ita-nia Povu, liuliu iha ita-nia foin-sa’e sira. Futuru husi ita-nia ekonomia no ita-nia dezenvolvimentu horik iha ita-nia Povu nia koñesimentu no kompeténsia. Ita mós sei garante katak ita-nia sidadaun sira sei iha kompeténsia nesesária atu okupa kargu tékniku no profisionál iha País laran tomak; Tulun setór privadu atu kria empregu signifikativu no dignu. Ita sei promove liután setór xave balun hanesan esportasaun kafé ho kualidade aas, prosesamentu produtu agríkola sira, peska, turizmu no konstrusaun. Ho investimentu hirak ne’e, ita promove komérsiu no investimentu diretu rai-li’ur nian. Ita sei hadi’a signifikativamente ita-nia klima negósiu nian; Hametin reziliénsia ita-nia populasaun sira-nian liuhusi rede seguransa sosiál ne’ebé forte, jestaun dezastre, sistema nasionál saúde nian ida-ne’ebé forte liu ho investimentu boot liu iha saúde primária no infraestrutura saúde públika no jestaun ambientál ne’ebé di’ak liu; Pasa husi dezenvolvimentu infraestrutura bázika, hanesan estrada, ba projetu infraestrutura estratéjika ne’ebé iha impaktu direta no loloos ba ekonomia no meiu subsisténsia ema nian. Ezemplu, ita atu instala kabu fibra ótika tasi-okos nian, no dezenvolve parke industriál no moderniza ita-nia portu no aeroportu ho hanoin atu garante presu ne’ebé kompetitivu liu no sirkulasaun sasán no ema nian; Reforma funsionamentu husi ita-nia podér judisiál no husi ita-nia administrasaun públika, ho hanoin atu garante justisa, efisiénsia, inovasaun, transparénsia no relasaun kustu-benefísiu iha buat hotu ne’ebé ita halo.https://www.facebook.com/370048750482193/videos/751836365418970/@MÉDIA MPM@