Dili, Tersa-Feira, 23/Junhu/2021-Ministru Petróleu no Minerais, Dr. Victor da Conceição Soares, akompanha husi Diretor Geral, Dr.Manuel Lemos, no Kargus Xefia & Diresaun MPM, no Prezidentes Instituisaun tuteladas MPM, Timor Gap, ANPM no IPG, hamutuk ho membrus VIII Governu Konstitusionál, partisipa iha Jornada Orsamental ba Orsamentu Jeral Estadu tinan 2022, ne’ebé mak lidera husi Sua Exélensia Primeiru Ministru Taur Matan Ruak, iha auditorium Ministériu Finansas.Sua Exelénsia Primeiru-Ministru Taur Matan Ruak, tersa-feira ne’e prezidi Jornada Orsamental ba Orsamentu Jeral Estadu tinan 2022 nian, durante loron ida tomak iha Ministériu Finansas, hamutuk ho membrus Governu tomak, Diretor Jeral no Nasionál sira, órgaun autónomu sira, Prezidente Autoridade no Administrador Munisípiu, ho tema, “Kualidade Orsamentu, Kresimentu Inkluzivu no Sustentável” ne’ebé mak organiza hosi Ministériu Finansas, hodi defini hamutuk programa prioridade sira ba tinan fiskál 2022 nian. Ajenda iha jornada orsamentu ne’e mak hanesan, aprezentasaun kona-ba diretivas no atualizasaun progresu, impaktu Surtu COVID-19, inundasaun no problema estruturais, proposta kona-ba programa prioridade sira no senáriu fiskál ba tinan 2022 nian. Iha jornada refere, define hamutuk programa neen mak sai prioridade ba tinan fiskál 2022, mak hanesan (1), Dezenvolvimentu Kapitál Umanu (edukasaun, formasaun profisionál no saúde), (2), Abitasaun no Inkluzaun Sosiál, (3), Setór Produtivu (agrikultura, turizmu, ambiente no konetividade), (4), Dezenvolvimentu Setor Privadu, (5), Dezenvolvimentu Rurál no (6), Governasaun, ho tetu orsamentu dólar amerikanu billaun 1.5. Iha mensajen ikus molok taka jornada orsamentu ne’e, Xefe Governu agradese tebes ba prezensa Diretor Jeral no Nasionál sira, dirijente hosi órgaun autónomu sira, Prezidente Autoridade no Administrador Munisípiu hodi husu kolaborasaun nafatin atu esforsu ba elaborasaun orsamentu tuir prioridade ne’ebé define ona iha jornada orsamental ba tinan oin nian.Aproveita biban refere, Primeiru-Ministru husu mós ba liña ministeriais sira atu book iha ezekusaun orsamentu atual, tanba daudaun ne’e Governu fó ona flexibilidade tanba hakotu konfinamentu domisiliáriu, hafoin númeru ema vasina iha progresivu tebes, i ne’e sei ajuda Governu bele hakat ba normalidade foun hodi bele hahú atividade sósiu ekonómiku normal fali atu bele halo rekuperasaun ekonómika.
@MÉDIA MPM@mpm
