Dili, Kuarta-Feira, 01/Dezembru/2021-Ministru Petróleu no Minerais, Dr. Victor da Conceição Soares, hamutuk ho membrus VIII Governu Konstitusionál, akompanha Sua Exélensia Primeiru Ministru Taur Matan Ruak, hodi partisipa iha debate Proposta Lei númeru 35/V (4ª), Orsamentu Jeral Estadu ba tinan 2022, iha diskusaun jeneralidade, ne’ebé mak halao iha sala Plenaria Parlamentu Nasional.
Proposta OJE 2022 ho montante totál billiaun $1,675 sei uza hodi finansia Programas 45, liu husi prioridade nasionál ne’en (6), ho objetivu atu atinji dezenvolvimentu ida ne’ebé mak kualidade ho kresimentu ekonómiku ne’ebé mak inkluzivu no sustentável.Proposta OJE 2022 ne’ebé Oitavu Governu Konstitusionál aprezenta ba Parlamentu Nasionál, nu’udar kontinuidade husi kompromisu polítiku Oitavu Governu Konstitusionál nian ho sidadaun timor-oan sira, to’o mandatu ramata iha tinan 2023. Iha proposta OJE 2022 ne’e, Governu defini ona ho loloos objetivu haat (4) ne’ebé mak Governu hakarak alkansa iha tinan oin: 1) Atu kombate pandemia ne’ebé kauza husi Covid-19; 2) Atu proteje sidadaun sira; 3) Atu rekupera ekonomia no kria empregu; 4) Tinan 2022 hare’e hanesan tinan rekuperasaun ba pandemia Covid-19.
