Covalima-Suai, Sexta-Feira, 27/Maiu/2022-Ministru Petróleu no Minerais, Dr. Victor da Conceição Soares, akompanha diretamente husi Prezidente IPG, Eng. Gabriel Apáricio, hamutuk ho ekipa Tékniku husi Ministériu Petróleu no Minerais (MPM) no Institutu Petróleu no Geologia (IPG), kontinua halao vizita servisu iha Munisipiu Covalima-Suai. Objetivu husi visita servisu refere, hodi akompanha no intende atividades observasaun no atualizasaun resultadu estudu no investigasõens téknikas husi Institutu Petróleu no Geologia iha Covalima-Suai.
Durante halao vizita servisu ba loron daruak iha sitíu observasaun ba estudu no investigasõens téknikas husi ekipa tékniku IPG ne’e, Ministru Petróleu no Minerais, Dr. Victor da Conceição Soares ho ekipa MPM, hetan esplikasõens téknika detailhu diretamente husi Prezidente IPG, Eng. Gabriel Apáricio no Diretor Hidrogeolojía no Rekursu Mineral ba Institutu Petróleu no Geologia, Engº. Marcal Ximenes, hamutuk ho ekipa tékniku IPG nian, kona-ba observasaun loron segundu nian, hodi hare’e ba fatuk hirak ne’ebé mak identifikadu ona nu’udar fontes ba rezervatoriu mina nian, ne’ebé mak Prezidente IPG, Eng⁰.Gabriel Aparício hamutuk ekipa tékniku Institutu Petróleu no Geologia, halao esplikasõens téknika kona-ba tipu fatuk ho naran Metamorfíku ba formasaun Lolotoe nian, ne’ebé mak iha indikasaun no deskobre husi ekipa tékniku IPG katak sai nu’udar fontes prinsipal ba prosesu perfurasaun ne’ebé mak dadaun ne’e halao hela iha Covalima, no iha posibilidade nia resultadu hetan iha pronfunidade 1000 ital, no iha indikasaun katak fatuk refere mak ekipa husi Empreza hetan, tan ne’e mak ekipa IPG mai hatudu no halo esplikasõens téknika ba Ministru Petróleu no Minerais no ekipa kona-ba tipu fatuk , kor, postura no funsaun, ne’ebé mak konsidera hanesan rezervatoriu ka “source rock” atu nune’e bele intende prosesu refere, no ekipa kontinua ba aréa rai ketan iha mota laran aréa dalan high way nian, hodi identifika tan tipu fatuk Limestone, hodi halo esplikasaun ba Ministru Petróleu no Minerais, Dr. Victor da Conceição Soares no ekipa MPM kona-ba funsaun fatuk ne’ebé mak sai nu’udar mos rezervatoriu no fontes ba mina, no ekipa kontinua ba halao vizita servisu ba iha aréa dalan high way nian (jalan tol), hodi hetan mos eplikasõens téknika kona-ba risku ne’ebé mak afeta ba estrada refere, no aprezenta resultadu estudu tékniku ne’ebé mak identifika kauza ba rai halai hodi halo rai monu no taka estrada refere, hare’e husi aspeitu téknika, atu nune’e bele divulga ba komunidade sira hodi bele hapar no kumpriende kona-ba risku hirak ne’ebé mak kauza estrada refere sai afetadu.Prezidente IPG, Eng⁰.Gabriel Aparício, subliha liu tan katak, ” Data fizíku hirak ne’e importante tebes atu fornese no divulga, hodi ema bele intende no investe, liu-liu informasõens téknika kona ba tipu fatuk hirak ne’ebé mak sai nu’udar “source rock” ka rezervatoriu ba mina, haktuir Prezidente IPG, wainhira halao eplikasõens téknika ba Ministru Petróleu no Minerais ho ekipa MPM iha terenu.
Hafoin rona hotu aprezentasaun resultadu observasaun, investigasõens no estudu téknika, husi Prezidente IPG, Eng⁰.Gabriel Aparício no ekipa tékniku Institutu Petróleu no Geologia, Ministru Petróleu no Minerais, Dr. Victor da Conceição Soares, apresia no kontinua enkoraja ekipa téknika Institutu Petróleu no Geologia, atu halao kna’ar iha terenu ho diak atu nune’e bele produs resultadu servisus ho maximu, no atu konklui Ministru Petróleu no Minerais fo parabéns ba esforsus no resultadu servisus ne’ebé mak ekipa tékniku Institutu Petróleu no Geologia atinji ona.
