Barique-Natarbora, Sésta-Feira, 24/Junhu/2022-Ministru Petróleu no Minerais, Dr. Victor da Conceição Soares ho komitiva partisipa iha Lansamentu Projetu Timor Gap Pualaca Block no Programa Sosializasaun ba atividades Explorasaun Petróleu iha area Kontratu PSC-TL-OT-21-17.Bloku Pualaca ne’e, ninia operador mak Timor Leste nian kompania Nasional rasik, TIMOR GAP. Area kontratu ka konsensaun ida ne’e ajudika direta ba TIMOR GAP liu husi asina PSC ne’ebe mak halao iha fulan Dezembru tinan 2021. Objetivu prinsipal husi ajudikasaun PSC ne’e ba TIMOR GAP mak atu kontinua explora Timor-Leste ninia rekursu petróleo hodi hasa’e probabilidade deskobre tan kampu foun seluk. Objetivu segundu mak’a atu eleva mos Timor Gap nian konfiansa no konesementu atu bele hola parte iha atividade explorasaun petróleo ne’e rasik.
Ministru Petróleu no Minerais, Dr. Victor da Conceição Soares, liu husi ninia diskursu hato’o agradese wain ba Konseleiru Brigadeiru Jeneral Sabika Besi Kulit no Koronel Maubuti, no mos ba Nai Administrador Munisipiu tolu husi Manatuto, Manufahi no Viqueque ho Estruturas Munisipais, no mos ba Komando Munisipais PNTL ho Estrutura tomak, ba Institusõens tutelas MPM nian no Veteranus ne’ebé mak husi Munisipius tolu mak marka prezensa iha programa ne’e, no durante ne’e servisu no koopera diak ho Ministériu Petróleu no Minerais, agradese tomak ba Amo selebrante no ekipa aprezentasaun kultural bem vimdo ne’ebé mak kapas tebes, agradese mos ba komunidade iha rai Barique no reprezentantes sira mak mai husi Munisipiu tolu iha fatin refere, bazeia ba tema ne’ebé mak iha, ohin sei halao atividades rua, primeiru mak Lansamentu Projetu Timor Gap Pualaca Block no segundu mak Programa Sosializasaun Atividades Explorasaun Petróleu iha Area Kontratu PSC-TL-21-17, ho objetivu hodi halo esplikasaun, atu nune’e komunidade sira bele hetan esplikasaun lolos no informasaun lolos, atu sira bele intende projetu hirak ne’ebé mak atu halao iha fatin ne’e, ho nune’e mak komunidade sira sei intende no kumprende hodi laiha tan dúvida no bele koopera diak ho Governu liu husi Ministériu Petróleu no Minerais ho Instituisaun tutela Timor Gap mak sei mai implementa projetu ne’e”.
Bazeia ba enkuadramentu polítika ka progresus iha setor petróleu no minerais, wainhira Ministériu Petróleu no Minerais asume responsabilidade ne’e, hamutuk ho ninia Instituisõens tutelas sira, halo inisiativas, inovativas no transformasõens barak, ne’ebé mak balun hetan sussesu no balun hetan insussesu. Hahu’u husi konkursu ba blokus hirak ne’ebé mak halo iha tinan 2019 no 2020, VIII Governu ne’e kontinua reforsa no aselera liu tan no hetan ona resultadu husi konkursu ne’e, mak hetan ona emprezas potensial hamutuk lima, ne’ebé mak konstitui husi emprezas nasional rua, mak empreza estatal Timor Gap no empreza privada ETO, no empreza internasional tolu, primeiru mak Santos, dadaun ne’e nu’udar operador iha Bayu-Undan, ne’ebé mak iha interese ba bloku ne’ebé haleu Bayu-Undan, atu bele investe nafatin ba futuru, segundu mak empreza ENI husi Italia, ne’ebé mak investe kleur ona iha Timor-Leste, no kompromete hodi kontinua nafatin investe, no terseiru mak empreza internasional foun ida husi Kazaxtaun, ne’ebé mak hakarak mos investe.
Timor Gap mos halo parseria ho Timor Resources, hodi halo perfurasaun iha Suai ne’ebé mak hetan ona resultadu deskobrementu tékniku, no sei halo tan exersisiu ida iha faze tuir mai, hodi halo tan teste ida ba posu ne’ebé mak fura ona hodi bele hatene deskobrementu komersial no produsaun, no prosesu sei lao hela. Dadaun ne’e mobilizasaun halao ba terseiru posu, ne’ebé mak fulan oin sei hahu’u prosesu perfurasaun, hafoin sei kontinua mai iha Betano, iha foho Ailiku, tuir kalendariu sei halo perfurasaun iha tinan oin, ne’e mak relasaun servisu ho setor petróleu no gas.Kona-ba investimentu ka diversifikasaun seluk mak Ministériu Petróleu no Minerais ho Instituisaun tutelas kontinua halao esforsu hodi halo mak, Kódiku Mineiru ne’ebé mak aprovadu ona, tamba durante ne’e Timor-Leste depende deit ba petróleu no gas. Governu ne’e iha komprimisiu bo’ot, hodi tau iha prioridade kona-ba rekursu mineiru, tamba Kódiku mineiru ne’ebé mak uluk kuaze tinan barak halo projetu de leis, maes nunka pasa iha Parlamentu Nasional, maibe Governu ne’e liu husi Ministériu Petróleu no Minerais ho ninia Institusõens tutelas konsege aselera prosesu servisu ne’e hodi konsege mos konvense Parlamentu Nasional, ho unamidade halo aprovasaun no Prezidente Repúblika anterior promulga ona, no dadaun ne’e lao em vigor, no Atauro mak sai ultímu Munisipiu ne’ebé mak Ministru Petróleu no Minerais ho komitiva mos marka prezensa hodi halao sosializasaun ba Kódiku Mineiru ne’e hamutuk ho ekipa ANPM, tamba tuir informasõens téknika katak Atauro mos nu’udar Munisipiu ne’ebé mak iha potensia mineirus diak.
Liu husi VIII Governu konstitusional ne’e, Timor Gap hetan apoiu politíka bo’ot tebes, ho orsamentu ba Timor Gap ne’ebé mak durante ne’e kiik tebes, maibe Governu durante tinan rua tutuir malu ne’e, fo apoiu Timor Gap wainhira propoin orsamentu, no Ministru Petróleu no Minerais sempre fo apoiu hodi konvense membrus Governu sira iha nivel Konsellu Ministru to’o Parlamentu Nasional, nufim aprova hodi hasae orsamentu ba Timor Gap por volta de 60 ital milhoens, tamba durante ne’e orsamentu ba Timor Gap kiik liu, kuaze la to’o 10 milhoens, tamba ne’e Governu hakarak fo prioridade dunik ba empreza estatal iha setor petróleu no minerais atu insentiva hodi fo apoiu tomak atu Timor Gap bele exerse ninia funsaun didiak, hodi bele fasilita sira atu explora riku soin Timor-Leste nian mak durante ne’e iha hela rai okos. Liu husi Programa lansamentu ne’e, Governu hakarak fo prioridade dunik ba empreza estatal Timor-Gap iha setor petróleu no minerais, hodi insentiva atu sira bele exerse sira ninia funsaun halo didiak, atu nune’e bele fasilita sira hodi bele explora riku-soin Timor nian, tamba tinan barak ona hahu’u kedas wainhira estabelese Timor Gap, seidauk to’o iha faze ida agora realiza dadaun ne’e, tamba ne’e Governu dezafia Timor Gap atu bele asume responsabilidade, tamba durante ne’e sira hetan formasaun no preparasaun ne’ebé mak diak tebes, tan ne’e espera ke Projetu Timor Gap Pualaca Block no Programa Sosializasaun Atividades Explorasaun Petróleu iha Area Kontratu PSC-TL-21-17 ne’e bele lao ho sussesu hodi bele fo benefisiu ba povo tomak.
Prezidente Konsellu Administrasaun Timor Gap, Engº. António José Loiola de Sousa, iha fatin hanesan afirma katak, ” Timor Gap nu’udar empreza estatal, ninia papel importante mak atu identifika rekursu mak iha, hafoin kategoriza rekursu hirak ne’e, depois mak mak dezenvolve hodi optimiza opsaun, hodi nune’e bele fo benefisiu husi rekursu ne’e”. Objetivu prinsipal Timor Gap nian mak garante benefisiu ba estadu no povu Timor-Leste iha area juridisaun Timor-Leste nian. Tan ne’e Timor Gap iha dever no responsabilidade tomak ba kualker fatin ne’ebé mak Timor Gap marka prezensa, tenki iha impaktu ne’ebé mak signifikativu, no valor ne’ebé mak atu atinji, mak konstitui ba tolu, ida mak valor estratejiku husi rekursu ne’e, nu’udar empreza estatal bele dezenvolve no fo benefisiu ba estadu no povu, rua mak valor ekonómiku no komersial husi rekursu ne’e rasik, tolu mak valor sosio ekonómiku, katak ema mak sai sujetu ba dezenvolvimentu laos infrastrutura mak sai fali sujetu no ikus ema mak sai fali vítima. Tamba ne’e mak ba bloku ne’ebé mak dadaun ne’e Timor Gap marka prezensa, espera sei fo benefisiu komum ba povu tomak, laos fo benefisiu ba ema ida ka grupu ida deit.
Lansamentu Projetu Timor Gap Pualaca Block no segundu mak Programa Sosializasaun Atividades Explorasaun Petróleu iha Area Kontratu PSC-TL-21-17 ne’e marka mos prezensa husi Konseleiru Brigadeiru Jeneral Sabika Besi Kulit no Koronel Maubuti, Administrador Munisipiu tolu husi Manatuto, Manufahi no Viqueque ho Estruturas Munisipais, Reprezentante Prezidente ANPM, Prezidente IPG, Eng. Gabriel Aparício, Komisariu ba Greater Sunrise Governance Board, Sr. Juvinal Dias, Veteranus, Reprezentantes PNTL ho F-FDTL, Reprezentante Sosiedade Sivil, Amo Parokia Barique no Madre sira no mos Komunidade Barique-Natarbora.
