Díli, Tersa-Feira, 14/Junhu/2022-Ministru Petróleu no Minerais, Dr. Victor da Conceição Soares, partisipa no halo abertura ba Simeira Timor-Leste ba daha’at Kona-ba Enerjia no Minerais, ne’ebé mak halao iha City 8, Díli.Simeira ne’e realiza husi ANPM nu’udar Instituisaun tutela MPM, hamutuk ho Empreza konsultoria no promosaun enerjétika IN-VR petrólifera, no Simeira refere sei halao durante loron tolu, hahu’u husi loron 14 to’o 16 Junhu 2022, no simeira ba dahuluk ne’e hahu’u kedas iha tinan 2019 liu ba.
Objetivu husi simeira internasional ne’e, hodi atrai no dada investores mai Timor-Leste, hodi hare’e oportunidade no potensia ne’ebé mak Timor-Leste iha ligadu ho mina no gas ho mos riku soin seluk hanesan mineirus.Oradores importante iha Simeira ne’e mak Ministru Petróleu no Minerais, Dr. Victor da Conceição Soares, Prezidente ANPM, Engº. Florentino Mateus Soares Ferreira, Prezidente Konsellu Administrasaun Timor Gap, Engº. António José Loiola de Sousa no mos oradores sira seluk husi Kompanhia Patrosinador sira.
Ministru Petróleu no Minerais, Dr. Victor da Conceição Soares, ne’ebé mak reprezenta mos Sua Exélensia Primeiru Ministru, Taur Matan Ruak, liu husi ninia breves palavras, iha 4th Timor-Leste, Energy & Mining Summit (Simeira Timor-Leste ba dahat kona-ba Enerjia no Minerais) ne’e, hato’o pronfunda gratidaun ba delegasaun sira husi Australia, Indonesia, Singapura, Malaysia, United Kindom, Mosambique no nasõens seluk mak marka mos prezensa iha simeira ba loron dahuluk ne’e. Hato’o mos agradesementu ba ANPM, IN-VR no Santos mak hametin ona parseria hodi realiza simeira ne’e, no mos gratidaun hanesan hato’o ba parseirus no sponsor sira seluk mak hamutuk fo apoiu hodi realiza ona simeira ne’e.Ministru Petróleu no Minerais, afirma liu tan katak, ” Simeira ne’e importante tebes ba Timor-Leste, hodi kontempla Timor-Leste ninia industria mina no gas hafoin tinan sanulu resin walu (18) marka prezensa, tamba mina no gas sai nu’udar industria ne’ebé mak fundamental ba Timor-Leste, no maior fonte reseitas ba nasaun Timor-Leste, no ba oin mos sei dezenvolve mos industria mineiru, ne’ebé mak sei sai mos fonte foun ba reseitas nasaun nian”.
Durante mandatu iha VIII Governu konstitusional ne’e, suporta tebes inisiativa, inovasaun, no kreatividade tomak husi Instituisaun tutelas sira mak hetan supervizaun husi MPM hanesan ANPM, Timor Gap, IPG no TL-EITI. Komitmentu tomak husi lideransa ne’e, kontempla ona liu husi apoiu durante ne’e ba atividades explorasaun no perfurasaun iha posu Bayu-Undan, no mos perfurasaun dahuluk iha posu rai maran (onshore) ne’ebé mak lansa diretamente husi Sua Exélensia Primeiru Ministru Taur Matan Ruak.Primeiru Ministru ho Ministru Petróleu no Minerias, kontinua halao esforsu tomak hodi introdus kona-ba Armazenamentu kaptura karbonu ka Carbon Capture Storage (CCS), nu’udar parte ida mak liu husi memorandu intendementu ne’ebé mak asinadu ona entre ANPM ho Santos, no sei explora tan estrutura fasilitadoras ba regulamentasõens no kommersial. Inisiativa refere hato’o ona husi Primeiru Ministru RDTL ba iha Primeiru Ministru sesante Australia nian, Sr. Scott Morison, liu husi enkontru ikus mak halao ona entre Primeiru-Ministrua nain rua ne’e.
Liu husi oportunidade iha simeira loron ohin ne’e, Ministru Petróleu no Minerais hato’o ba Governu Australia katak, Timor-Leste liu husi ninia Instituisaun tutelas sira kontinua servisu makas hodi fo sussesu ba implementasaun projetu armazenamentu kaptura karbonu iha Timor-Leste, tan ne’e hakarak mos hare’e apoiu hanesan mai husi Governu Australia ba projetu refere.Kódiku mineiru ne’ebé mak pasa ona iha tinan ikus ne’e, no kódiku mineiru ne’e mos vigor ona iha inisiu tinan ne’e, sai mos nu’udar sétor fundamental ba dezenvolvimentu nasaun ne’e nian, espera bele atrai investores barak ne’ebé mak iha interese hodi mai investe iha Timor-Leste.VIII Governu konstitusional kontinua halao esforsu maximu, hodi restaura no rekopera hikas ekónomia liu husi diversifikasaun ekónomia no atividades sira iha sétor mina, gas, mineiru nune’e mos ho tourismu ne’ebé mak sai mos nu’udar sétor fundamental mak preciza tau atensaun spesial.
Atu konklui breves palavras ba simeira ne’e, Ministru Petróleu no Minerais, Dr. Victor da Conceição Soares, hodi naran Sua Exélensia Primiru-Ministru Taur Matan Ruak, hato’o sussesu tomak ba simeira ne’ebé mak sei halao durante loron tolu hahu’u husi loron 14 to’o 16 Junhu 2022, no espera bele alkansa objetivu tomak mak sai prioridades iha simeira refere.Prezidente ANPM, Engº. Florentino Mateus Soares Ferreira, liu husi konferensia imprensa ne’ebé mak halao durante simeira ne’e, akresenta katak, ” Liu husi simeira refere, sai nu’udar oportunidade hodi bele promove Timor-Leste ninia projetus hamutuk sanulu resin lima (15), ne’ebé mak projetu 6 iha rai maran/onshore no projetu hamutuk 9 mak iha tasi laran/offshore”. “Importante tebes atu kontinua hametin parseria ho empreza internasional sira, hodi halao explorasaun mina no gas iha Timor-Leste”.
Prezidente Konsellu Administrasaun Timor Gap, Engº. António José Loiola de Sousa iha ninia diskursu mos akresenta katak, “Timor-Gap ninia papel importante nu’udar empreza estatal estadu Timor-Leste nian mak atu identifika, karakteriza, dezenvolve no optimiza valor estratéjiku, komersiu no sosiu ekónomiku husi mina no gas iha área jurídiksaun Timor-Leste nian, ba benefisiu estadu no povu Timor-Leste. Ne’e bele atinji liu husi transforma dezafius tomak mak infrenta husi Timor-Leste hodi sai ba oportunidade ida, hodi atrai investor sira liu husi simeira ida ne’e, no hamutuk ho organizasaun sira husi nasaun seluk no espesialista internasional sira, ami kontinua servisu hamutuk hodi hadiak liu tan no kuantifika rekursu nasaun Timor-Leste nian”. “Kona-ba mineiru no petróleu, Timor Gap kontinua aktualiza nafatin siénsia jeólojia tantu iha rai maran/onshore no mos tasi laran/offshore”.
Prezidente Konsellu Administrasaun nu’udar mos Managing Diretor ba Kompanhia Santos, Sr. Kevin Gallagher liu husi diskursu iha simeira ne’e, sublinha katak, “Santos sei investe mos ba Bayu-Undan, kona-ba CCS (Carbon Capture and Storage) ka armazenamentu kaptura karbonu, ne’e nu’udar projetu ne’ebé tuir kálkulu sei kaptura no halo armazenamentu ba karbonu hamutuk 10 jutas metrik toneladas karbonu dioksida (CO2) kada tinan iha Bayu-Undan, no alemde ne’e, ba produsaun Bayu Undan ne’ebé mak besik hotu ona, preciza desmantela fasilidades balun ne’ebé mak hanaran decommissioning, ne’e ita sei halao servisu hodi máximiza konteudu lokal, hanesan oportunidade ba Timor-oan sira hodi servisu ka bems servisu ne’ebé mak mai husi Timor-Leste”.
