Díli, Tersa-Feira, 21/Junhu/2022-Ministru Petróleu no Minerais Dr. Victor da Conceição Soares, akompanha husi Prezidente Konsellu Administrasaun Timor Gap, Engº. António José Loiola de Sousa, Prezidente IPG, Engº. Gabriel Aparício, Vise Prezidente ANPM, Engº. José Gonsalves, Komisariu ba Greater Sunrise Governance Board, Sr. Juvinal Dias, Diretor ba Dezenvolvimentu no Produsaun ANPM, Sr. Fernando Silva, Assesor Tékniku MPM, Engº. Gilsel Borges no Assesor Komunikasaun MPM, Engº. Ivo Tilman, halao sorumutu ho Prezidente Repúblika, Dr. José Ramos Horta, iha Pálasiu Prezidente, Aitarak laran.
Sorumutu refere ho objetivu hodi halo aprezentasaun no briefing ba Prezidente Repúblika, Dr. José Ramos Horta ligadu ho Setor Petróleu, Gas no Minerais.Ministru Petróleu no Minerais Dr. Victor da Conceição Soares, iha ninia introdusaun ba aprezentasaun iha sorumutu ho Prezidente Repúblika ne’e, fo agradesementu ba Sua Exélensia Prezidente Repúblika, ne’ebé mak konvida ona ekipa refere (MPM ho Instituisaun tutelas sira ANPM, TIMOR GAP no IPG) hodi mai halo aprezentasaun no briefing kona-ba setor petróleu, gas no minerais, no Ministru Petróleu no Minerais afirma katak, ” Hau hakarak halo enkuadrmentu ida, tamba ita hatene katak setor petróleu no minerais ne’e, setor ida ke vital, tamba ita nia estadu durante ne’e dependente los ba setor ne’e, kuaze 80 pursentu hosi Orsamentu Geral Estadu mai husi setor ne’e, hafoin 20 anos ita ukun-an, únika fonte ne’ebé mak durante fo reseitas ba nasaun mak setor ne’e, ne’ebé mak dadaun ne’e Posu Bayu-Undan kumesa iha dekliniu ka tama ona iha faze ba fim da vida util ba produsaun, tan ne’e mak hahu’u kedas iha tinan 2020, Governu iha kedas ona planu hodi diversifika investimentu ba atividades explorasaun petrólíferu iha área onshore no mos offshore, atu nune’e iha tempu tuir mai bele hetan substituisaun ba iha kampu uníku Bayu-Undan ne’e”.
Dr. Victor da Conceição mos akresenta katak, ” Atividades no esforsu ne’ebé mak dadaun ne’e Ministériu Petróleu no Instituisaun tutela halao mak halo ona konkursu ba promosaun segunda ronda ne’ebé mak hahu’u kedas iha tinan 2019, no iha 2020 kontinua reforsa nafatin to’o iha 2022 foin dadaun ne’e tama ona iha faze konkursu no konklui ona hodi hetan dunik emprezas lima ne’ebé mak potensiais, rua mak empreza nasional mak Timor Gap nu’udar empreza estatal no empreza privadu ETO, no empreza tolu seluk mak empreza internasional mak Santos, ENI no empreza ida husi nasaun Tazikistaun”.
Progresu tuir mai sei halo asinatura kona-ba PSC nian, no iha tempu besik, ANPM nu’udar Autoridade Reguladora sei halo kontratu ba asuntu ne’e. Ligadu ho Bayu-Undan ne’ebé mak hah’u dekliniu ona, sei halao mos decommision ka desmantelamentu, maibe iha ona akordu ida ho Governu Australia liu husi MoU ne’ebé mak halao entre Kompanhia Santos no ANPM kona-ba Projetu Armazenamentu no Kaptura Karbonu ka CCS, hodi bele atrai investidores ba setor ne’e iha futuru, hodi sai insentivu ida diak, atu nune’e explorasaun ba setor petróleu no minerais ne’e viavel nafatin.
Ligadu ho atividades explorasaun husi Kompanhia Timor Resources mak dadaun ne’e halao hela atividades perfurasaun iha Suai, no Governu ne’e kontinua fo apoiu polítika no ANPM kontinua fo assistensia hodi sira nafatin halo perfurasaun iha posu primeiru feto kmaus ne’ebé mak konklui ona, maibe dadaun ne’e suspende tamba kestaun téknika, no segundu posu mos konklui ona hodi atinji nia albu profundidade no tuir relatoriu iha ona deskobrementu téknika, no faze tuir mai sei halo teste ba deskobrementu ne’e. Dadaun ne’e Timor Resources halo mobilizasaun hodi halo perfurasaun foun iha posu Lafahek Suai no wainhira konklui, sei ba kontinua iha posu iha área Same ho Hatudo nian.
Ministru Petróleu no Minerais mos sita iha aprezentasaun katak, ” Projetu Tasi Mane ne’ebé definidu mos iha Planu Estratéjiku Dezenvolvimentu Nasional no Governu ne’e kontinua promove, embora tenki ser atualiza no redifini Projetu ne’e, hodi kuantifika didiak rekursu petróleu no gas hodi iha serteja ida mak foin halo grande projetu ba ida ne’e, tamba tenki hatene uluk lai kuantidade iha parte upstream mak kria grandes projetu, se lae to’o ikus ninia kuantidade ne’e laiha ekilibru, ne’e ita sei investe sala, tan ne’e mak Governu husu ba Timor Gap atu redifini fila fali Projetu Tasi Mane ne’e”.
Kona-ba Suai Supply base, ne’e nesesidade dunik, tenki iha kondisõens mínimu ida, hodi apoiu ita prosesu karega no deskaregamentu tamba dadaun ne’e halao hela atividades perfurasaun, no kona-ba refinaria Betano, tenki mos toma iha konsiderasaun, hodi bele priensi rekrizitus mínimu nesesarius ne’ebé mak ita tenki iha hodi bele responde. No kona-ba Projetu Timor-Leste LNG Beaço, agora dadaun sai atensaun ba Governu ne’e, tamba negosiasõens ne’ebé mak dadaun ne’e halo iha Greater Sunrise, iha progresu ne’ebé mak lao diak tebes, estadu Timor-Leste no Australia intende malu diak tebes, hodi resulta dokumentus kona-ba Kódiku Petrólífera PMC no PSC konklui ona, ho mos Rejíme Spesial ba Greater Sunrise hamutuk ho dokumentus seluk tan mak Governu rua ne’e konkorda ona hodi intrega ba Sunrise Joint Venture atu sira bele do reasaun hodi konkorda ga la konkorda, no Governu Timor-Leste no Australia mos konkorda ona, hodi halo kalendariu ida to’o fim do ano, dokumentus hirak ne’e tenki ser konklui no asina ona, no sei fo oportunidade no posibilidade katak hahu’u iha tinan oin mai, tama ona iha faze dezenvolvimentu ba kampu refere. Ne’e mak avansus hirak ne’ebé Governu liu husi Ministériu Petróleu no Minerais hamutuk ho ninia Instituisaun Tutelas atinji no kontinua reforsa prosesu servisus hirak ne’e ba oin.
Tan nee mos foin dadaun realiza Simeira Timor-Leste kona-ba Enerjia no Mineira ho mos realiza Tour ka vizita husi Suai liu mai Betano no to’o mai iha Beaço, hodi hatudu seriedade husi Governu ne’e hodi halo dezenvolvimentu hodi bele dada kadoras mai iha Timor-Leste.Kódiku Mineiru ne’ebé mak promulgadu ona, Governu, liu husi MPM, desidi atu hamoris no hasa’e atividade explorasaun seitor minerais hodi kontribui reseitas ba kaixa Estadu, nune’e mos hafoin Sua Exélensia Prezidente Repúblika promulga tiha estabelesementu Kompania Nasional Mineru hodi bele diretamente partisipa/involve iha atividade komersial mineru (exemplu: hanesan Timor Gap iha setor petróleo.) sei jere atividade extrasaun mineru hotu iha Timor Leste, Kódigu Mineiru vigora ona desde janeiru 2022. ho nune’e Kódiku Mineiru loke dalan ba dezenvolvimentu no investimentu iha setor ne’e, no oras ne’e dadaun, ANPM dezenvolve no prepara hela leis no regulamentus komplementares hodi kompleta Kodigu Mineru hodi jere atividade extrasaun mineira. Dekretu Lei ba estabelesementu Kompania Mineru, aprovadu ona iha Konsellu Ministrus, no promulgadu ona husi Presidente Repúblika, no faze tuir mai sei kria mos Lei Fundu Mineru hafoin Kompania Mineru estabelese ona, afirma Ministru Petróleu no Minerais.
Kona-ba área downstream, Governu liu husi MPM no Timor Gap halo hela planu hodi estabele Petroleum Import Terminal ka PIT, ne’ebé mak Timor-Leste precizamente tenki iha polítika ida kona-ba seguransa enerjétika, tamba durante ne’e laiha armazen ba nesesidades enerjia ba tempu ne’ebé mak naruk, hodi armazena enerjia pelu menus ba fulan tolu, nune’e wainhira akontese krisi enerjia, ita sei bele responde ba situasaun emerjensia ne’e, no dadaun ne’e Timor Gap servisu makas hela ba estabelesementu PIT ne’e.No ikus liu Ministru Petróleu no Minerais akresenta kona-ba simeira Timor-Leste ba enerjia no mineira foin dadaun realiza ona, fo vantajen mai Timor-Leste, no liu husi gala dinner ne’ebé mak Prezidente Repúblika mos hola parte no Kompanhia Santos deklara hakarak mos kolabora hodi kontribui no hola parte ba Prezidente Repúblika ninia programa, atividade simeira ne’e MPM ho ANPM realiza hodi bele estimula no konvida invetores sira mai kuaze 200 pessoas ital, no sira interese dunik hodi mai investe iha setor petróleu no minerais.
Hafoin akompanha no rona tiha aprezentasaun husi Ministru Petróleu no Minerais ho Prezidente no Vise Prezidente Instituisaun tutelas ANPM, TIMOR GAP no IPG, Prezidente Repúblika, Dr. José Ramos Horta liu husi ninia intervensaun, hato’o agradesementu ba briefing ne’ebé mak diak tebes no informativu tebes husi ekipa refere, no Prezidente Repúblika sente kontente tebes ho kontinuidade servisus ne’ebé mak ekipa ne’e kontinua halao hodi hatutan servisus ne’ebé mak Governu anterior sira halo ona, hahu’u husi Programa Primeiru Governu Konstitusional to’o mai iha VIII Governu Konstitusional ne’e kontinua hatutan, ne’e servisu ne’ebé mak diak tebes. Prezidente Repúblika mos koloka perguntas no perkupasaun téknika balun ligadu ho asuntu safety wainhira dada kadoras mai Timor-Leste wainhira akontese rai nakdoko, investimentu iha setor petróleu no gas ligadu ho presu mina ne’ebé mak fluktuativu, maneira transportasaun petróleu no gas husi plataforma mai iha fatin designadu no investimentu ba Greater Sunrise.
Hafoin ne’e, Ministru Petróleu no Minerais hamutuk ho Prezidente Timor Gap, Vise Prezidente ANPM, Prezidente IPG no Tékniku sira, responde diretamente no detailhus ba perguntas sira hotu mak koloka husi Prezidente Repúblika no aumesmu tempu fo briefing kumpletu ba Prezidente ligadu ho asuntus tékniku sira ba setor petróleu, gas no minerais nian, no Prezidente satisfeitu ho respostas hotu, no sei akumula hamutuk resposta hirak ne’e hodi bele responde ba entidades relevantes sira husi rai liur no rai laran wainhira halao reuniaun ho Prezidente Repúblika kona-ba setor petróleu no minerais, no Prezidente Repúblika mos husu ba Ministru Petróleu no Minerais no komitiva, atu bele fornese hela materia aprezentasaun ne’ebé mak aprezenta ona, ba Prezidente Repúblika atu utiliza no le’e informasõens tékniku pertinente hirak ne’e nu’udar referensia importante ba Prezidente Repúblika.
