Díli, Sésta-Feira, 03/Junhu/2022-Ministru Petróleu no Minerais, Dr. Victor da Conceição Soares, hamutuk ho membrus VIII Governu Konstitusionál, kontinua akompanha Sua Exélensia Primeiru-Ministru, Taur Matan Ruak, hodi partisipa iha Debate Espesialidade ba Proposta Lei Grande Opsõens ba Planu 2023 iha plenária Parlamentu Nasional.Lei das Grandes Opções do Plano (GOP) nia objetivu mak atu sai hanesan ponte ida entre dokumentus planeamentu (PED, Programa Oitavu Governu Konstitusionál, Planu Anuál no Planu Médiu Prazu husi Servisus no Entidades Estadu sira) no Orsamentu Jerál Estadu. Liu husi sesaun Plenária iha loron Kinta-Feira horseik loraik iha Parlamentu Nasional ne’e, aprova ona ona iha Jeneralidade Proposta Lei das Grandes Opções Plano 2023 nian, ho votus afavor 36, kontra 15 no abstensaun 5.Iha loron Sésta-Feira, 3 Junhu 2022 ohin, Parlamentu Nasionál liu husi sesaun Plenária Estraórdinariu ba Debate Espesialidade, aprova ona iha finál globál Proposta Lei das Grandes Opções do Plano 2023 ho 42 votu a favor, 18 kontra no 2 abstensaun.Grandes Opções do Plano 2023 kontein medidas ka atividades prinsipál hamutuk 263 liuhusi Programas 45 iha área estratéjiku 16 ne’ebé Governu sei foku iha tinan oin. Proposta Lei GOP inklui estimasaun orsamentu multi anuál hahú husi 2023 to’o 2027 nomós tetu agregadu ba OJE 2023 ho montante billiaun $3,15 ne’ebé sei aloka ba Administrasaun Sentrál billiaun $2,8, RAEOA millaun $120, no Seguransa Sosiál millaun $235,7. Despesa Globál aprovadu ba OJE 2023 mak billiaun $3,15. Ida-ne’e hatudu iha redusaun 8% husi OJE Retifikativu 2022 ne’ebé nia montante totál $3.419.539.539.Ho aprovasaun husi Parlamentu Nasionál ne’e mak Governu termina ona Faze Planeamentu – faze dahuluk husi elaborasaun OJE 2023 tuir espiritu Lei Foun Enkuadramentu Orsamental. Tuir-mai Governu sei kontinua ba Faze Preparasaun Orsamentu ne’ebé sei hahú ho Reuniaun Anuál entre Governu no Parseirus Dezenvolvimentu (TLDPM) ne’ebé sei realiza iha loron 10 fulan-juñu molok hakat ba Jornada Orsamentál iha loron 30 fulan-juñu 2022.Ba oin, Komisaun C ne’ebé trata asuntu Finansas Públikas, Parlamentu Nasionál no Governu sei finaliza redasaun finál molok haruka Diploma ne’e ba Gabinete Prezidénsia Repúblika hodi entrega ba Prezidente Repúblika Dr. José Ramos-Horta atu tetu. Sesaun Plenária Estraordinariu ne’e prezidi husi Prezidente Parlamentu Nasionál, Dr. Aniceto Longuinhos Guterres Lopes, akompanha husi membrus Meza Parlamentu Nasionál ho prezensa husi Primeiru-Ministru, Jenerál Taur Matan Ruak, Ministru Finansas, Rui Gomes, inklui Membrus Oitavu Governu Konstitusionál. Ministru Rui Gomes hetan akompañamentu husi Diretores-Gerais, Diretores Nacionais no Tékniku sira husi Ministériu Finansas.
