𝐋𝐀𝐍𝐒𝐀𝐌𝐄𝐍𝐓𝐔 𝐊𝐎𝐍𝐊𝐔𝐑𝐒𝐔 𝐏Ú𝐁𝐋𝐈𝐊𝐔 𝐁𝐀 𝐌𝐈𝐍𝐄𝐑𝐀𝐈𝐒 𝐌𝐄𝐓Á𝐋𝐈𝐊𝐔𝐒 𝐍𝐎 𝐌𝐈𝐍𝐄𝐑𝐀𝐈𝐒 𝐍Ã𝐔𝐍 𝐌𝐄𝐓Á𝐋𝐈𝐊𝐔𝐒 𝐁𝐀 𝐓𝐈𝐍𝐀𝐍 𝟐𝟎𝟐𝟑

Ministru Petróleu no Minerais Dr. Victor da Conceição hamutuk ho Vise-Primeiru Ministru no Ministru ba Planu no Ordenamentu, Eng⁰. José Maria dos Reis partisipa iha 𝐋𝐚𝐧𝐬𝐚𝐦𝐞𝐧𝐭𝐮 𝐊𝐨𝐧𝐤𝐮𝐫𝐬𝐮 𝐏ú𝐛𝐥𝐢𝐤𝐮 𝐛𝐚 𝐌𝐢𝐧𝐞𝐫𝐚𝐢𝐬 𝐌𝐞𝐭á𝐥𝐢𝐤𝐮𝐬 𝐧𝐨 𝐍ã𝐮𝐧 𝐌𝐞𝐭á𝐥𝐢𝐤𝐮𝐬 𝐛𝐚 𝐭𝐢𝐧𝐚𝐧 𝟐𝟎𝟐𝟑, no aumesmu tempu halao abertura ba atividades minerais nian, no seremónia lansamentu refere halao iha auditóriu Ótel Novu Turismu, Díli.

Lansamentu Konkursu Públiku ne’e, halao bazeia ba Rezolusaun Governu n.º 07 /2023, ne’ebé mak aprova abertura áreas ba realizasaun atividades mineiras no termus referênsia konkursu ba atribuisaun direitus mineiru hodi promove indústria mineira iha Timor-Leste.

Ministru Petróleu no Minerais Dr. Victor da Conceição Soares, liu husi diskursu iha seremónia refere, ” Hato’o apresiasaun no agradesementu ba ilustres konvidadus sira hotu, hodi mai partisipa iha eventu históriku ida ne’e, nu’udar passu importante kona-ba lansamentu “konkursu públiku ba minerais metálikus no minerais nãun metálikus iha Timor-Leste ba tinan 2023 ne’e”.

Ministru Petróleu no Minerais mos hato’o agredesimentu ba Dirijentes no Téknikus sira husi ANPM no MPM, ne’ebé mak durante ne’e halo esforsu makás hodi servisu hamutuk no iha koperasaun ne’ebé diak hodi kontribui ona ba dezenvolvimentu Indústria Mineira no elaborasaun ba regulamentus ba atividades mineiras iha Timor-Leste, tamba ne’e hanesan atinjimentu bo’ot ida iha sétor minerais iha Timor-Leste.

Pilares importante ba dezenvolvimentu ekonómiku futuru Timor-Leste nian, ida mak sétor petróleu no minerais. Realidade mak ne’e, sétor Petróleu no Minerais kontinua hanesan pilar ekonómiku fundamental ida ba Timor-Leste iha futuru mai, hodi sustenta nafatin dezenvolvimentu sosiu-ekonómiku, Industrial no infraestruturas hodi fo prosperidade no moris diak ba povu Timor-Leste. Maibe, VIII Governu Konstitusional mos fo nafatin prioridade ba diversifikasaun ekonómika, hodi investe iha sétor produtivu sira seluk mak hanesan Agrikultura, Pekuaria, Turizmu no sira seluk tan, haktuir Ministru Petróleu no Minerais.

Ba oin, Ministériu Petróleu no Minerais hamutuk ho ANPM sei kontinua servisu makás liu tan hodi kria leis no regulamentus komplementares, vokasionadu ba jestaun efisiente, transparente tuir boas prátikas industria mineira, no estabelesimentu Fundu Mineiru husi atividades mineiras tuir prinsipiu transparensia no prezervasaun reseitas ba jerasaun sira tuir mai.

Ministériu Petróleu no Minerais, konsiente ba dezafius ne’ebé atividade ne’e ejiji, no Ministériu empenhadu nafatin hodi fo apoia Institusiónal nesesariu, no sentidu de permite maior partisipasaun husi emprezariu nasiónal no internasiónal iha sétor mineiru, ho projetu sira ne’ebé iha futuru mai sei abranje diversus seguimentus ne’ebé mak kontribui ba múltiplas oportunidade ba kriasaun valor indústria transformadora mineiras nian.

Seremónia Lansamentu Konkursu Públiku ba Minerais Metálikus no Nãun Metálikus ba tinan 2023 ne’e, partisipa mos husi Xefe Estadu Maior Tenente Jenerál FALINTIL-FDTL, Falur Rate Laek, Vise Xefe Estadu Maior Jenerál Forsa Armada, Major Jenerál Calisto Santos Coliati, Brigadeiru Jenerál Maunana, Reprezentante Veteranus, Prezidente ANPM, Engº. Florentino Mateus Ferreira Soares, Vise Prezidente Autoridade Nasional Petróleu no Minerais (ANPM), Eng. José Gonsalves hamutuk ho ekipa Téknika husi ANPM, Prezidente Konsellu Administrasaun Companhia Mineira Timor-Leste (CMTL, S.A), Engº. Eliud de Jesus Gomes akompanha husi Membru Konsellu Administrasaun CMTL, Sr. Emanuel Angelo Lay, Vise Prezidente Institutu Petróleu no Geologia, Eng. Oktoviano Tilman de Jesus, ekipa husi Ministériu Petróleu no Minerais, Diretores no Reprezentantes husi Emprezas Internasionál no Nasionál hamutuk ho Konvidadus sira.