𝐌𝐈𝐍𝐈𝐒𝐓𝐑𝐔 𝐏𝐄𝐓𝐑Ó𝐋𝐄𝐔 𝐍𝐎 𝐌𝐈𝐍𝐄𝐑𝐀𝐈𝐒 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐉𝐎𝐑𝐍𝐀𝐃𝐀 𝐏𝐋𝐀𝐍𝐄𝐀𝐌𝐄𝐍𝐓𝐔 𝐓𝐈𝐍𝐀𝐍 𝟐𝟎𝟐𝟒 𝐁𝐀 𝐀𝐏𝐑𝐄𝐒𝐈𝐀𝐒𝐀𝐔𝐍 𝐌𝐄𝐃𝐈𝐃𝐀𝐒 𝐏𝐑𝐈𝐍𝐒𝐈𝐏𝐀𝐈𝐒 𝐁𝐀 𝐋𝐄𝐈 𝐆𝐑𝐀𝐍𝐃𝐄𝐒 𝐎𝐏𝐒Õ𝐄𝐍𝐒 𝐁𝐀 𝐏𝐋𝐀𝐍𝐔 𝟐𝟎𝟐𝟒

Ministru Petróleu no Minerais, Dr. Victor da Conceição Soares, hamutuk ho membrus VIII Governu Konstitusionál, partisipa iha Jornada Planeamentu Tinan 2024 ba Apresiasaun Medidas Prinsipais ba Lei Grandes Opsõens ba Planu 2024, iha Auditóriu Ministériu Finansas, Díli.

Semináriu ne’e halao ho tema “𝐇𝐚𝐦𝐮𝐭𝐮𝐤 𝐇𝐚𝐝𝐢’𝐚𝐤 𝐧𝐨 𝐇𝐚𝐦𝐞𝐭𝐢𝐧 𝐌𝐞𝐝𝐢𝐝𝐚𝐬 𝐏𝐫𝐢𝐧𝐬𝐢𝐩𝐚𝐢𝐬 𝐎𝐫𝐬𝐚𝐦𝐞𝐧𝐭𝐮 𝐉𝐞𝐫á𝐥 𝐄𝐬𝐭𝐚𝐝𝐮 𝟐𝟎𝟐𝟒, 𝐡𝐨𝐝𝐢 𝐏𝐫𝐨𝐦𝐨𝐯𝐞 𝐊𝐫𝐞𝐬𝐢𝐦𝐞𝐧𝐭𝐮 𝐈𝐧𝐤𝐥𝐮𝐳𝐢𝐯𝐮 𝐧𝐨 𝐒𝐮𝐬𝐭𝐞𝐧𝐭á𝐯𝐞𝐥”, no Prezidi husi Primeiru-Ministru, Taur Matan Ruak no Modera husi Ministru Finansas, DR. Rui Gomes, Jornada Planeamentu ne’e halao ba Daruak iha istória Timor-Leste nian, hafoin país ne’e restaura ninia independénsia.

Durante realiza seminariu ne’e, ekipa Diresaun Jerál Planeamentu no Orsamentu (DJPO), Ministériu Finansas, halao mos aprezentasaun kona-ba mekanismu elaborasaun GOP, Medidas Prinsipais, Senáriu Fiskál no proposta Tetu Fiskál ba OJE 2024, nomós aprezentasaun kona-ba Prioridades Nasionál liga ba Objetivus Nasionál husi Ajénsia Nasionál Planeamentu, Avaliasaun no Monitorizasaun (ANAPMA).

Semináriu ne’e halao ho objetivu prinsipál mak atu asegura medidas prinsipais ne’ebé mak sei kontempla iha GOP ba tinan 2024, aliña ho Planu Estratéjiku Dezenvolvimentu, Programa Oitavu Governu Konstitusionál, Planu Estratéjiku Setorál inklui Planu Rekoperasaun Ekonómiku no halo aliñamentu ba Rezultadu Nasionál ne’ebé mak ANAPMA dezenvolve ona.

Rezultadu ne’ebé mak hakarak atinji no hetan husi Semináriu ne’e mak: Primeiru, Partisipante sira hatene kona-ba prosesu elaborasaun Grandes Opsõens Planu ba tinan 2024. Segundu, Partisipante sira iha koñesimentu kona-ba estratéjia no mekanismu rasionalizasaun medidas GOP 2024, hodi hetan apresiasaun ba medidas prioridades ba OJE 2024, akresenta Ministru Finansas, DR. Rui Gomes iha seminariu refere.

Ba oin, Ministériu Finansas sei kompila medidas sira ne’ebé mak hetan ona apresiasaun ba iha Proposta Lei das Grandes Opsõens ba Planu 2024, no sei aprezenta ba Konsellu Ministrus iha tempu badak nia laran antes submete ba Parlamentu Nasional iha inísiu fulan-abril hodi diskute no aprova.

Seminariu ne’e partisipa máximu husi Membrus Oitavu Governu Konstitusionál, Prezidentes Autoridades, Administradores Munisípius, Responsável Instituisaun Estadu no Órgaun Servisus Fundu Autónoma, Diretores-Gerais, Diretores Nasionáis no Xefes Departementus Liñas Ministériais, Reprezentantes Sosiedade Sivíl, Confissões Religiosas, Setór Privadu no Téknikus Finansas Públikas sira.