𝐑𝐄𝐏𝐑𝐄𝐙𝐄𝐍𝐓𝐀𝐍𝐓𝐄 𝐌𝐈𝐍𝐈𝐒𝐓É𝐑𝐈𝐔 𝐏𝐄𝐓𝐑Ó𝐋𝐄𝐔 𝐍𝐎 𝐌𝐈𝐍𝐄𝐑𝐀𝐈𝐒 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐐𝐔𝐈𝐍𝐓𝐀 𝐊𝐎𝐍𝐅𝐄𝐑Ê𝐍𝐒𝐈𝐀 𝐁𝐀 𝐏𝐀Í𝐙 𝐌𝐄𝐍𝐔𝐒 𝐃𝐄𝐙𝐄𝐍𝐕𝐎𝐋𝐕𝐈𝐃𝐔𝐒 𝐈𝐇𝐀 𝐃𝐎𝐇𝐀, 𝐐𝐀𝐓𝐀𝐑

Reprezentantes husi Ministériu Petróleu no Minerais (MPM), kompostu husi Xefe Departamentu Polítika no Planeamentu MPM, Sr. Judenio da Costa Belo no Tékniku Superior ba Planeamentu no Orsamentu MPM, Sra. Rosa Hanjam Morato, partisipa iha Quinta Konferênsia ba País Menus Dezenvolvidus (Least Development Countries, LDCs, Sigla Inglesh, iha Doha, Qatar.

Reprezentantes sira husi Ministériu Petróleu no Minerais partisipa iha Quinta Konferênsia ba País Menus Dezenvolvidus ne’e, hamutuk ho delegasaun Timor-Leste nian, ne’ebé mak kompostu husi Sua Exelénsia Prezidente Repúblika, Vise Prezidente Parlamentu Nasionál, Ministra Negosius Estranjeirus no Kooperasaun, Ministru Finansas, ho Reprezentantes husi linhas Ministérial mak hanesan: MCAE, MTCI, MAP, SEA nomos Sosiedade Sivil, Sétor Privadu ho Reprezentantes Foin Sae sira.

Delegasaun Ministériu Petróleu no Minerais, nian, partisipa iha Quinta Konferensia ba País Menus Dezenvolvidus (Least Development Countries – LDCs, Sigla Inglesh) iha Doha, Qatar ne’e, bazeia ba konvite husi Ministériu Negosius Estranjeirus no Kooperasaun, iha Fulan Outobru tinan 2022, ho objetivu atu halo preparasaun no elaborasaun informasaun husi kada linhas Ministériais, inkluindu MPM, ba diskursu husi Sua Exelésia Prezidente Repúblika, iha Simeira Líder husi Paízes Menus Dezenvolvidus – LDCs, ne’ebé mak organiza diretamente husi Nasões Unidas, husi loron 04 to’o 09 fulan Marsu tinan 2023, iha Doha, Qatar.

Além ida ne’e, ekipa MPM no linhas Ministériais mos prepara no elabora materia ba iha sessaun meja paralelu temátika nivel a’as, (High-Level Thematic Round Table), husi Round-Table 1 to’o iha Round Table 8, atu nune’e Timor-Leste bele halo intervensaun no diskusaun tuir ajenda.Durante loron lima Konferensia LDCs nian iha Doha ne’e, lideransa mundiál husi 46 Paízes, halibur hamutuk ho setór privadu, sosiedade sivil, deputadu sira no foin-sa’e sira, hodi promove ideias foun sira, foti promesas foun sira kona-ba apoiu, no promove kompromisu sira ne’ebé mak hetan ona akordu, liu husi Programa Asaun Doha (DPoA sigla Englishs), no hein katak sei anunsia inisiativa espesífiku sira no fornesimentu konkretu ne’ebé sei responde ba dezafius espesífiku ba Paíz Menus Dezenvovildus sira.

Objetivu prinsipal husi Konferensia ne’e, hanesan oportunidade atu aselera dezenvolvimentu sustentavel iha pais sira, ne’ebé mak sei presiza asistênsia internasionál no konsidera potênsia tomak husi Paíz Menus Dezenvolvidus, atu hetan apoiu ba progresus no dalan ba prosperidades.Paíz Menus Dezenvolvidus – LDCs, iha direitu atu hetan assesu ba merkadu preferensiál sira, asisténsia téknika espesiál no kapasitasaun kona-ba téknolojia, inovasaun, rekursus humanu no apoiu finansiamentu ba dezenvolvimentu, no forma apoiu sira seluk bazeia ba Programa Asaun Doha (DPoA Sigla English), wainhira paíz refere seidauk gradua husi País Menus Dezenvoolvidu-LDCs.

Konferensia ne’e organiza liu husi sesaun plenária, meza paralelu temátika nivel aas (High-Level Thematic Round Table), no eventu adisional sira seluk, kona-ba prioridades temátika oin-oin husi Programa Asaun Doha (DPoA sigla English).