𝐏𝐀𝐑𝐋𝐀𝐌𝐄𝐍𝐓𝐔 𝐍𝐀𝐒𝐈𝐎𝐍Á𝐋 𝐀𝐏𝐑𝐎𝐕𝐀 𝐎𝐍𝐀 𝐈𝐇𝐀 𝐅𝐈𝐍𝐀𝐋 𝐆𝐋𝐎𝐁𝐀𝐋, 𝐁𝐀 𝐀𝐋𝐓𝐄𝐑𝐀𝐒𝐀𝐔𝐍 𝐏𝐑𝐎𝐉𝐄𝐓𝐔 𝐋𝐄𝐈𝐒 𝐊𝐎𝐍𝐀-𝐁𝐀 𝐓𝐑𝐈𝐁𝐔𝐓𝐀𝐒𝐀𝐔𝐍 𝐊𝐎𝐍𝐓𝐑𝐀𝐓𝐀𝐍𝐓𝐄𝐒 𝐁𝐀 𝐁𝐀𝐘𝐔-𝐔𝐍𝐃𝐀𝐍 𝐇𝐎 𝐑𝐄𝐉Í𝐌𝐄 𝐋𝐀𝐁𝐎𝐑𝐀𝐋 𝐍𝐎 𝐌𝐈𝐆𝐑𝐀𝐓Ó𝐑𝐈𝐔 𝐄𝐒𝐏𝐄𝐒𝐈𝐀𝐋 𝐀𝐏𝐋𝐈𝐊Á𝐕𝐄𝐋 𝐁𝐀 𝐏𝐑𝐎𝐉𝐄𝐓𝐔 𝐁𝐀𝐘𝐔-𝐔𝐍𝐃𝐀𝐍

Ministru Petróleu no Minerais, Dr. Victor da Conceição Soares, akompanha husi ekipa Téknikus husi Autoridade Nasionál Petróleu no Minerais (ANPM), partisipa iha diskusaun ho Deputadus sira iha Plenaria Parlamentu Nasionál.Diskusaun refere ho objetivu hodi halao votasaun ba jeneralidade, espesialidade hodi tama ba votasaun final global ba Projetu Lei n.⁰ 54/V (5ª), prosede ba segunda alterasaun Lei n.º3/2003, 1 Julhu, kona-ba Tributasaun Kontratantes ba Bayu-Undan, nomos Projetu Lei n.º 55/V (5ª), prosede ba primeira alterasaun Lei n.º 4 /2019, 27 Agostu, ne’ebé mak aprova Rejíme Laboral no Migratóriu Espesial Aplikável ba Projetu Bayu-Undan.

Ministru Petróleu no Minerais, Dr. Victor da Conceição liu husi aprezentasaun iha Plenaria Parlamentu Nasionál, afirma katak, ” Relatoriu ne’ebé mak ohin fo ne’e, reflete dunik ba Governu ninia espetativas ba futuru, atu kompleta, hodi ita bele hein to’o tempu ita iha ona kondisõens, wainhira Leis enkuadramentu legal iha fatin, atu nune’e bele iha ona kondisaun hodi prosede ba desmantelamentu, wainhira Lei ne’e hetan ona aprovasaun iha Parlamentu Nasionál.

Prezidente Komisaun D, ne’ebé mak trata assuntu Ekonómia no Dezenvolvimentu, Deputadu Antoninho Bianco, liu husi intervensaun iha Plenaria ne’e mos haktuir katak, ” Projetu Lei rua ne”e atu halo extensaun aplikavel regras sira, ho atividade desmantelamentu ba Projetu Bayu-Undan, atu nune’e bele proteje no asegura Trabalhadores sira, wainhira prosesu desmantelamentu ne’e halao”.

Hafoin Deputadus sira halao diskusaun iha jeneralidade, Deputadus sira mos kontinua kedas ba diskusaun iha espesialidade, hodi aprova iha final global.Deputadus Parlamentu Nasionál sira aprova ona alterasaun ba Projetu Lei ne’ebé mak prosede ba segunda alterasaun Lei N⁰ 3/2003, 1 Julhu, kona-ba Tributasaun Kontratantes ba Bayu-Undan, ho Resultadu Votasaun iha Final Global : Afavor: 36, Kontra: 1, Abstensaun: 0.

Deputadus Parlamentu Nasionál mos aprova ona alterasaun ba Projetu Lei ne’ebé mak prosede ba primeira alterasaun Lei N.⁰ 4/2019, 27 Agostu, ne’ebé mak aprova Rejíme Laboral no Migratóriu Espesial Aplikável ba Projetu Bayu-Undan, ho Resultadu Votasaun iha Final Global : Afavor: 37, Kontra: 0, Abstensaun: 0.