𝐆𝐎𝐕𝐄𝐑𝐍𝐔 𝐆𝐀𝐑𝐀𝐍𝐓𝐄 𝐄𝐗𝐏𝐋𝐎𝐑𝐀𝐒𝐀𝐔𝐍 𝐏𝐄𝐓𝐑𝐎𝐋𝐈́𝐅𝐄𝐑𝐀 𝐈𝐇𝐀 𝐊𝐎𝐒𝐓𝐀 𝐒𝐔𝐋

Sua Eselénsia Ministru Petróleu no Rekursu Minerais, Francisco da Costa Monteiro, atende konvite husi Komissaun D Parlamentu Nasionál ba Assuntu Ekonomia no Dezenvolvimentu, hodi aprezenta prespektiva kona-ba explorasaun petrolífera ne’ebé implementa husi empreza Timor Resources ho parseria husi TIMOR GAP, iha Kosta Súl.

“Bele dehan katak, investimentu ida iha rai maran, investimentu pioneiru, ne’ebé di’ak ema tau osan ona to’o 70 milloes, sempre iha dezafiu balun, sempre iha nia problema balun ne’ebé mosu, maibé husi parte governu iha kompromissu atu buka solusaun di’ak para la’o ba oin,” Deklara Eselénsia Ministru Petróleu no Rekursu Minerais hafoin audiénsia ho komissaun D.

Dadaun ne’e, empreza Timor Resource halo hela perfurasaun ba posu petróleu iha Feto Kmaus, Liurai no Lafaek, Munisípiu Covalima no exekutivu buka hakle’an tan informasaun, hodi dezenvolve iha tinan hirak mai.

“ Ami husu señor Ministru atu aselera servisu sira ne’e, hodi produz reseita mai ita-nia rain iha tempu badak, iha komisaun D ami la iha opozisaun, ami iha komprimissu ba povu no rai ida ne’e, la iha opozisaun, apoiu politiku sein reserva, hodi governu bele halo servisu iha tempu besik” Deklara Prezidente Komissaun D Ricardo Baptista.

Ba loron 120, Sua Eselénsia Ministru Petróleu no Rekursu Minerais deklara katak sei halo re-estruturizasaun iha setor ne’e, sei re-estabelese negosiasaun ho Austrália no kompaña sira, hodi bele finaliza Petrolium Mining Code, Tax Regime, Production Sharing Contract iha tempu badak oin mai, hein katak, dokumentu sira ne’e bele finaliza antes fim do ano, hodi loke dalan ba negosiasaun hodi assegura kadoras Greater Sunrise mai Timor-Leste.