Sua Eselénsia Ministru Petróleu no Rekursus Minerais, Francisco da Costa Monteiro, partisipa Tersa-Feira ne’e, diskussaun Planu Asaun Anual ba tinan 2024 ne’ebé realiza iha Ministériu Finansa, Díli.
Enkontru ne’ebé lidera husi Sua Eselénsia Vise Primeiru Ministru no Ministru Koordenadór ba Assuntu Dezenvolvimentu Rurál, Mariano Assanami Sabino, partisipa husi membru Governu sira, Diretór Jerál no Diretór Finansa no Planeamentu husi liñas ministeriais.
Entretantu, Iha diskussaun Jornada Orsamentu Jerál Estadu 2024 foin lalais ne’e, Sua Eselénsia Primeiru Ministru, Xanana Gusmão defende katak, Orsamentu Jerál Estadu tinan 2024, sei estimula dezenvolvimentu ekonómiku no hadi’a povu nia moris.
“Ita-nia objetivo mak atu promove ambiente ida nebé la’ós de’it atrai investimentu estranjeiru, maibé mós kria oportunidades ba ita-nia empreendedores lokais no pequenas empresas sira. Bainhira ita apoia sectores hirak-né, ita bele liberta ita-nia povo nia potensial tomak no impulsiona kresimentu ekonómiku ne’ebé sustentável,” Destaka Sua Eselénsia Primeiru Ministru.
Ba Xefe Exekutivu, liñas orientadoras ba desizaun finanseira mak transparánsia, responsabilizasaun, inkluzaun no sustentabilidade, hodi materializa komprimissu nasaun nian ba bem estar no dezenvolvimentu sustentável, ho foku prinsipál mak seitór infraestruturas, edukasaun, saúde, agricultura, petróleo no jestaun rekursu.
