𝗠𝗣𝗥𝗠 𝗛𝗢𝗟𝗔 𝗣𝗔𝗥𝗧𝗘 𝗜𝗛𝗔 𝗘𝗡𝗞𝗢𝗡𝗧𝗥𝗨 𝗘𝗡𝗧𝗥𝗘 𝗠𝗜𝗡𝗜𝗦𝗧𝗥𝗨𝗦 𝗘𝗡𝗘𝗥𝗝𝗜𝗔 𝗔𝗦𝗘𝗔𝗡 𝗡𝗜𝗔𝗡

𝗠𝗶𝗻𝗶𝘀𝘁𝗿𝘂 𝗣𝗲𝘁𝗿𝗼́𝗹𝗲𝘂 𝗻𝗼 𝗥𝗲𝗸𝘂𝗿𝘀𝘂𝘀 𝗠𝗶𝗻𝗲𝗿𝗮𝗶𝘀 𝗧𝗶𝗺𝗼𝗿-𝗟𝗲𝘀𝘁𝗲 𝗵𝗼𝗹𝗮 𝗽𝗮𝗿𝘁𝗲 𝗶𝗵𝗮 𝗲𝗻𝗸𝗼𝗻𝘁𝗿𝘂 𝗲𝗻𝘁𝗿𝗲 𝗠𝗶𝗻𝗶𝘀𝘁𝗿𝘂𝘀 𝗘𝗻𝗲𝗿𝗷𝗶𝗮 𝗔𝗦𝗘𝗔𝗡 (𝗔𝗠𝗘𝗠 – 𝗦𝗶𝗴𝗹𝗮 𝗶𝗵𝗮 𝗜𝗻𝗴𝗹𝗲́𝘇) 𝗵𝘂𝘀𝗶 𝗹𝗼𝗿𝗼𝗻 𝟮𝟰 𝘁𝗼’𝗼 𝟮𝟱 𝗳𝘂𝗹𝗮𝗻 𝗔𝗴𝗼𝘀𝘁𝘂 𝗶𝗵𝗮 𝗕𝗮𝗹𝗶 𝗜𝗻𝗱𝗼𝗻𝗲́𝘇𝗶𝗮, 𝗵𝗮𝗻𝗲𝘀𝗮𝗻 𝗼𝗯𝘀𝗲𝗿𝘃𝗮𝗱𝗼𝗿.

Partisipasaun Ministru Petróleu no Rekursus Minerais (MPRM) iha enkontru Altu Nível husi Ministrus Enerjia ASEAN nian ba dala-41, bazeia ba konvite husi Sua Eselénsia, Ministru Enerjia no Rekursu Naturais Indonezia nian, Arifin Tasrif.

Iha eventu intensivu durante loron rua, iha Nusa Dua Bali, Indonézia, delegasaun Timor-Leste honradu hodi hola parte iha Forúm Emprezariál ba Enerjia ASEAN (AEBF – Sigla iha Ingléz) 2023 ne’ebé realiza to’o loron 26 Fulan Agostu.

Prezensa Timor-Leste nian iha enkontru ne’e akontese, hafoin admitidu hanesan membru ASEAN ba dala – 11 no fó estatuto observadór ba Konferénsia Altu Nível ASEAN tinan 2022 iha Kambodia. Objetivu husi AMEM mak, hametin kooperasaun iha dezenvolvimentu rekursus enerjétiku iha ASEAN no dada partisipasaun seitór privadu no investimentu.

Durante loron rua, AMEM ba dala – 41 no enkontru assosiadu sira (Inklui AMEM + 3, reuniaun altu nível Ministrus Enerjia husi Azia Orientál – “EAS EMM – Sigla iha Ingléz” Diálogu entre CEO no OI nian, no mós reuniaun bilaterál sira) hodi kobre kestaun sira ligadu ho senáriu enerjétiku, ne’ebé dezenvolve iha rejiaun. Tema oi-oin, hahu ho hanoin hamutuk ba neutralidade karbonu no viabilidade ba partisipasaun seitór privadu no investimentu iha seitór enerjétiku.

Durante diskursu, Ministru Francisco da Costa Monteiro destaka importánsia husi medida koletiva, hodi hari’i futuru enerjétiku ida ne’ebé mak sustentável no reziliente. Pozisaun ne’e refleta ba objetivu husi AMEM, ne’ebé representa komprimissu Timor-Leste nian, atu sai parte integrante iha rejiaun no diálogu mundiál ne’ebé afeta ba seitór enerjia.

Timor-Leste nia partisipasaun ativa hanesan observador hanesan pasu importante, hodi aliña ho polítika nasionál enerjétika, ho objetivu rejionál no aproveita oportunidade sira ne’ebé hetan husi reforsu kooperasaun iha konjuntura ASEAN.