𝗠𝗣𝗥𝗠 𝗡𝗢 𝗜𝗡𝗦𝗧𝗜𝗧𝗨𝗜𝗦𝗔𝗨𝗡 𝗧𝗨𝗧𝗘𝗟𝗔 𝗥𝗘𝗔𝗟𝗜𝗭𝗔 𝗦𝗘𝗠𝗜𝗡𝗔́𝗥𝗜𝗨 𝗞𝗢𝗡𝗔-𝗕𝗔 𝗣𝗟𝗔𝗡𝗨 𝗔𝗦𝗔𝗨𝗡 𝗔𝗡𝗨𝗔́𝗟 𝟮𝟬𝟮𝟰 𝗡𝗢 𝗢𝗥𝗦𝗔𝗠𝗘𝗡𝗧𝗨 𝗕𝗔𝗭𝗘𝗜𝗔 𝗕𝗔 𝗣𝗥𝗢𝗚𝗥𝗔𝗠𝗔

Ministériu Petróleu no Rekursus Minerais ho instituisaun tutela sira hanesan TIMOR GAP EP no Murak Rai EP, Autoridade Nasional Petróleu- ANP, Autoridade Nasional Minerais ANM. IP, Institutu Geosiénsia Timor-Leste – IGTL, Extrative Industry Transparancy Iniciative Timor-Leste TL-EITI Kinta-Feira ne’e, realiza semináriu kona-ba planu asaun anuál 2024 no orsamentu bazeia ba programa.

“Orsamentu bazeia ba programa, ita ko’alia uluk programa, sub-programas, atividades hotu mak foin mak sei halo mapeamentu ba atividade sira ne’e presiza osan hira, akumula tiha, Ministério presiza osan hira no ita seidauk to’o iha pontu ida ne’e” Tenik Sua Eselénsia Ministru Petróleu no Rekursus Minerais, Francisco da Costa Monteiro.

Programas Prioritárias husi Ministériu Petróleu no Rekursus Minerais no instituisaun tutela sira mak hanesan, dezenvolvimentu husi kampu Gás Greater Sunrise no assegura gazodutu mai Timor-Leste, dezenvolve infraestruturas ba apoiu projektu Tasi Mane no Explorasaun no dezenvolvimentu ba bloku potensiál husi explorasaun petrolífera iha Onshore no Offshore.

“Ministériu ninia objetivu prinsipál mak kontribui ativamenete ba aumentu rendimento ba nasaun, kontribui ba dezenvolvimentu sósiu ekonómiku, katak atividade hotu iha seitor petróleu tenke kontribui ba kresimentu ekonomiku, envolve maka’as seitor privadu, ita-nia povu, sosiedade hotu hetan benefísiu husi atividade petróleo no minerais no kontribui ba kriasaun empregu” Tenik Sua Eselénsia Ministru.

Programa husi Ministériu Petróleu no Rekursus Minerais reflete ba Objetivu Dezenvolvimentu Sustentável – ODS ho objetivu, atu promove kresimentu ekonómiku inkluzivu no sustentável, empregu plenu, produtivu no dignu ba ema hotu.

Kona-ba projektu Tasi Mane, Exekutivu hakarak halibur sinergia servisu, hodi aposta dezenvolvimentu integradu husi indústria petrokímika no planta Gas Naturál Liquifeitu – GNL iha fatin ida, hodi halo poupansa ba orsamentu, investimentu no jestaun ba risku ambiental.

Antes ne’e, governu planeia instalasaun Gas Naturál Liquifeitu – GNL iha Beasu no indústria petrokímika iha Betanu, maibé ho mudansa planu exekutivu nian, katak projektu integradu ne’e sei implementa iha área Natarbora, Munisípiu Manatutu.