𝐀𝐔𝐓𝐎𝐑𝐈𝐃𝐀𝐃𝐄 𝐋𝐎𝐊𝐀𝐋 𝐒𝐔𝐊𝐔 𝟖 𝐈𝐇𝐀 𝐋𝐎𝐒𝐏𝐀𝐋𝐎𝐒 𝐎𝐅𝐈𝐒𝐈𝐀𝐋𝐌𝐄𝐍𝐓𝐄 𝐒𝐈𝐌𝐔 𝐊𝐍𝐀’𝐀𝐑 𝐇𝐎𝐃𝐈 𝐒𝐄𝐑𝐁𝐈’𝐈 𝐏𝐎𝐕𝐔

Autoridade Lokál husi suku Bauro, Cacavei, Fuiluro, Home, Leuro, Muapitine, Raça no Souro ne’ebé eleje husi povu iha fulan Outubru no Novembru nia laran, ofisialmente exerse kna’ar hodi serbi’i povu husi 2023 to’o 2030.

Iha serimónia tomada de posse, ne’ebé realiza hafoin serimónia dada Bandeira Nasionál 28 Novembru iha Lospalos, Sua Eselénsia Ministru Petróleu no Rekursus Minerais, Francisco da Costa Monteiro lé mensajen husi Sua Eselénsia Primeiru Ministru Kay Rala Xanana Gusmão, kona-ba kna’ar ne’ebé mak líder komunitáriu atu assume durante mandatu.

“Momentu ida ne’e la’os deit marka tempu hahu mandatu sira hotu, ne’ebé ohin sira simu posse maibé mos hatudu komprimissu ida, atu hatu’ur hikas prinsípiu ne’ebé fundamental, ne’ebé sai hanesan rin no ba ita-nia regime demokrátiku no ba objetivu estratéjiku ne’ebé hatuur ona husi ita-nia governu hodi promove dezenvolvimentu nasional,” Tenik Sua Eselénsia Primeiru Ministru ne’ebé transmite husi Sua Eselénsia Ministru Monteiro.

Tuir Xefe Governu, kna’ar ne’ebé mak autoridade lokál assume mak sai intermediáriu entre governu no povu, hodi projeta ba hari’i sosiedade justu, inkluzivu no prósperu liu tan.

“Baihira fasilita diálogu hato’o nesesiade husi komunidade no promove partisipasaun sívika iha ambitu kada comunidade lokal nian, mak haforte duni aliserse hirak ba ita nia demokrasia. Demokrasia la’os deit sistema governasaun ida, maive komprimisu ida ne’ebe la kotu, relasiona ho justiça, igualdade no partisipasaun” Fundamenta Sua Eselénsia Primeiru Ministru.

Hafoin juramentu, Sua Eselénsia Ministru Monteiro hodi governu nia naran, assina termu de posse, hodi ofisializa inísiu mandatu husi autoridade lokál husi suku walu ne’ebé existe iha Postu Administrativu Lospalos.