𝐖𝐎𝐎𝐃𝐒𝐈𝐃𝐄 𝐍𝐎 𝐓𝐈𝐌𝐎𝐑-𝐋𝐄𝐒𝐓𝐄 𝐊𝐎𝐍𝐊𝐎𝐑𝐃𝐀 𝐒𝐄𝐑𝐕𝐈𝐒𝐔 𝐇𝐀𝐌𝐔𝐓𝐔𝐊 𝐇𝐎𝐃𝐈 𝐃𝐄𝐙𝐄𝐍𝐕𝐎𝐋𝐕𝐄 𝐆𝐑𝐄𝐀𝐓𝐄𝐑 𝐒𝐔𝐍𝐑𝐈𝐒𝐄

Sua Eselénsia Ministru Petróleu no Rekursus Mineraiss, Francisco da Costa Monteiro, SeguNDA-Feira ne’e, hasoru malu ho Señora CEO Woodside Meg, O’Neil ho nia ekipa hodi deskuti kona-ba dezenvolvimentu Greater Sunrise iha tempu besik.

Kompaña Petrolífera Woodside no Timor-Leste konkorda atu servisu hamutuk no fiar malu, tanba governu Timor-Leste aprova ona estudu ba selesaun konseitu ba projektu ne’e.

“Estudu ba selesaun konseitu ba Greater Sunrise hetan ona aprovasaun husi sua eselénsia Señor Ministru, ho governu Timor-Leste nia naran, ho ida ne’e atu fo hatene katak, ami prontu ona, komesa servisu ba buat ne’ebe presiza atu bele avalia, opsaun sira ne’ebe mak iha kona-ba projektu Greater Sunrise nian” Tenik Señora CEO Woodside Meg O’Neil hafoin hasoru malu ho Sua Eselénsia Ministru Petróleu no Rekursus Minerais.

Sua Eselénsia Ministru Monteiro elojia postura husi lideransa Woodside atual, tanba hakarak koolabora malu, hodi dezenvolve Kampu Greater Sunrise, liu-hosi avaliasaun ba konseitu estudu hotu.

“Ami halo aprovasaun ba selesaun estudu konseitu ba Greater Sunrise, atu bele tau dokumentu hot-hotu iha meza leten, hodi avalia didi’ak, vantajen no dezvantajen hotu. Ami aseita ona se bele karik ami servisu maka’as iha meadus ka antes finais tinan oin, ita bele to’o iha pontu ruma hodi hola desizaun” Tenik Eselénsia Ministru.

Hafoin halo aprovasaun ba selesaun estudu konseitu, TIMOR GAP, Autoridade Nasional Petróleu – ANP no Kompaña Joint Venture sei kontinua ho enkontru intensivu iha semana ne’e nia laran, hodi finaliza dokumentu ne’ebé aprovadu no analiza mos Kódigu Mineiru ba Petróleu, Rejime Taxa no Kontratu ba Partilla Produsaun.