𝗘𝗠𝗕𝗔𝗜𝗫𝗔𝗗𝗢́𝗥 𝗨𝗔𝗘 𝗩𝗜𝗭𝗜𝗧𝗔 𝗞𝗢𝗥𝗧𝗘𝗭𝗜𝗔 𝗕𝗔 𝗠𝗜𝗡𝗜𝗦𝗧𝗥𝗨 𝗣𝗘𝗧𝗥𝗢́𝗟𝗘𝗨 𝗡𝗢 𝗥𝗘𝗞𝗨𝗥𝗦𝗨𝗦 𝗠𝗜𝗡𝗘𝗥𝗔𝗜𝗦

Sua Eselénsia Ministru Petróleu no Rekursus Minerais, Francisco da Costa Monteiro Segunda-Feira ne’e, halo enkontru ho delegasaun ida husi embaixada Emiradus Arabes Unidus iha Indonézia, hodi explora possibilidade kooperasaun no oportunidade investimentu iha área enerjia renovável, oléu, gás no minerais.

Delegasaun ne’e lidera husi Sua Eselénsia Embaixadór Emirados Arabes Unidus iha Jakarta Abdulla Salem Aldhaheri. Embaixadór Aldhaheri iha esperiénsia kle’an durante dekada rua iha seitór petróleu no gas, liu-liu manifesta interesse atu explora oportunidade iha seitór petróleu, gás no minerais. Objetivu mak estabelese ligasaun entre emprezas husi Emidados Arabes Unidos no Timor-Leste ho promove oportunidade kolaborasaun iha área hirak ne’e.

Reuniaun ne’e inklui figura importante hanesan Xefe Assuntu Ekonomia iha Ebaixada Emirados Arabes Unidus, Señora Merah Eid Alzeezi, Espesialista Seniór ba Assuntu Ekonómiku Señor Tariq Rashid Alsuwaidi no Senora Prezidente Diretór husi Masdar Clean Energy, sediada iha Indonézia, Fatima Al Suwadi.

Masdar ka Abu Dhabi Future Energy Company hanesan empreza estatal koñesidu no kria iha tinan 2006, hodi atua iha projektu enerjia renovável no Masdar konsege dezvia krítika hanesan nasaun produtor fóssil no defende assuntu ambiental iha Emirados Arabes Unidus.

Reuniaun ne’e marka passu signifikavu iha fortalesimentu relasaun bilateral entre Timor-Leste no Emiradus Arabes Unidus, liu-liu iha seitór enerjia.