Sua Eselénsia Ministru Petróleu no Rekursus Minerais, Francisco da Costa Monteiro no Señor Vise Prezidente Kompaña Sul Koreana SK E&S Ilyung Kim, Sexta-Feira ne’e, assina akordu parseria ba implementasaun projetu Kaptura no Armajenamentu Karbonu (CCS – Sigla iha Inglez).
Kompaña SK E&S hanesan Kompaña daruak bo’ot liu iha Korreia do Sul espesializada iha teknolojia, enerjia renovável, hidrojerasaun no Kaptura no Armajenamentu Karbonu.
“Sei servisu hamutuk ho governu Timor-Leste, hodi buka oportunidade, deskobre kampu gas hodi inklui iha CCS. Projetu CCS hanesan oportunidade ida, hodi kontribui ba ekonomia Timor-Leste. SK E&S sei servisu hamutuk ho governu Timor-Leste hodi realiza saída mak assina ohin, iha tempu badak nia laran” Tenik Señor Vise Prezidente Kompaña Sul Koreana SK E&S, Ilyung Kim.
Projektu CCS hanesan parte ida husi teknolojia ne’ebé bele reduz produsaun gás kabonu dioksida – CO2 ne’ebé mak iha efeitu maka’as ba ambiente no Timor-Leste hakarak implementa projektu ne’e, relasiona ho fim husi produsaun kampu petróleu Bayu Undang iha tempu besik.
“Timor-Leste bele sai hanesan nasaun ne’ebe iha potencial bo’ot teb-tebes atu bele dezenvolve indústria CCS, principalmente kampu Bayu undang ne’ebé atu hotu no iha oportunidade bo’ot atu konverte bá armajenamentu CCS, entaun ministériu hamutuk ho SK E&S iha tempu hirak mai sei dezenvolve esforsu konjuntu ida” Tenik Sua Eselénsia Ministru Monteiro.
Akordu parseria ne’ebé assina ona ho durasaun tinan ida, maibé kontestualiza ho estudu sira, hodi estabelese akordu definitiva entre governu Timor-Leste no SK E&S, hodi halo investimento, la’os de’it iha CCS maibé área seluk ne’ebé importante mos ba ekonomia Timor-Leste nian.
