𝐌𝐔𝐃𝐀𝐍𝐒𝐀 𝐄𝐒𝐓𝐑𝐀𝐓𝐄́𝐉𝐈𝐊𝐀 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐏𝐄𝐓𝐑𝐎𝐋𝐈́𝐅𝐄𝐑𝐔 𝐈𝐇𝐀 𝐁𝐄𝐓𝐀𝐍𝐔 𝐍𝐎 𝐍𝐀𝐓𝐀𝐑𝐁𝐎𝐑𝐀

Desizaun histórika ida husi Governu Konstitusionál da-sia lideradu husi Sua Eselénsia Kay Rala Xanana Gusmão, mak foku dezenvolvimentu petróleu ne’ebé antes planeadu atu hari’i iha Betano, sofre realiñamentu estratéjiku signifikativu. Determina ona katak, refinaria no instalasaun petrokímika ne’ebé antes ne’e prevista ba Betano, agora sei transfere ba Natarbora. Medida ida ne’e atu hadi’a efisiénsia operasionál, kria sinergia iha indústria petrolífera no hamenus impaktu ambiental.

Durante sosializasaun kona-ba implementasaun projektu Kosta Súl ba komunidade no autoridade lokál iha Betanu, Sua Eselélensia Ministru Petróleu no Rekursus fahe planu governu no planu mestre husi TIMOR GAP E.P. Planu ne’e envolve dezenvolvimentu infraestruturas ne’ebé bele apoia Gás Naturál Liquifeitu – GNL, petrokímika no operasaun refinaria iha fatin ne’ebé estratéjikamente viável.

Dezenvolvimentu iha Betanu sei la para, maibé sei konsentra ba atividade agríkola, pekuária no atividade empreendimentu ekonómiku  ne’ebé benefisia indústria petrolífera.  Presidente Autoridade Munisipál Manufahi konfiante katak, ho dezenvolvimentu Kosta Sul no mudansa estratéjiku husi indústria ba Natarbora, kontinua dezepeña papel krusiál, hodi hamoris ekonomia  nasaun nian no materializa aspirasaun husu jerasaun ne’ebé luta ba ukun rasik-an.

Mudansa politika governu nian, inklui mos planu atu garante katak, infraestruturas importante ba indústria estabelecida hanesan, portu no auto estrada no mos dezenvolvimentu husi prespetiva sustentabilidade ambiental no efisiensia ekonómika.

Além de ne’e, komprimissu atu lori Projetu Greater Sunrise mai rai-maran, alínea ho estratégia ida ne’e, hodi garante operasionalidade husi fábrica GNL no indústria seluk ne’ebé reforsa investimentu infraestruturas ne’ebé kria ona no planeia atu kria, hodi hodi impulsiona substansialmente esforsu ba dezenvolvimentu ekonómiku.