Konsellu Mininistru aprova Sexta-Feira ne’e, autorizasaun ba despeza relasiona ho implementasaun projetu Tasi Mane, ho valór dólar amerikanu millaun hat nulu, rihun atus lima.
Projetu ne’e, aprezenta husi Ministru Petróleu no Rekursus Minerais, Francisco da Costa Monteiro no Ministru Planeamentu no Ivestimentu Estratéjiku, Gastão de Sousa no orsamentu ne’ebé Konsellu Ministru fó autorizasaun, inklui iha Fundu Infraestruturas, alokadu ba Ministériu Petróleu no Rekursus Minerais.
Ba oin, Ministru Monteiro tenik katak, Komissaun Nasional Aprovizionamentu (CNA – Sigla iha Portuguéz), tutela iha Ministériu Planeamentu no Investimentu Estratéjiku sei lansa konkurssu internasionál, hodi buka empreza kualifikadu no halo aranju ba finansiamentu projetu Suai Supply Base no Auto Estrada husi Postu Administrativu Zumalai ba Natarbora.
Governu sei aloka inisialmente dólar amerikanu millaun 36 ba nesesidade despeza relasiona ho projetu estretéjiku ne’e, enkuantu valór husi projetu Auto Estrada no Suai Supply Base, finansiamentu no partisipasaun estadu nian iha projetu ne’e estratéjiku ne’e, sei defini hafoin prosesu aprovizionamentu ne’ebé administra husi Komissaun Nasional Aprovizionamentu
Ministru Petróleu no Rekursus Minerais, destaka importánsia husi projetu Auto Estrada Zumalai – Natarbora no Suai Supply Base ne’ebé hanesan pré kondisaun ida, atu dada kadoras mina no gás husi Kampu Greater Sunrise ba Natarbora, tanba sai hanesan infraestrutura fasilitadora, hodi mobiliza materiál husi Suai Supply Base hodi konstrui Planta GNL, Petrokímika no Refinaria.
