Governu atribui tersa-feira ne’e, lisensa ba prospesaun no peskiza ba minerais non metáliku no lisensa ambiental ba empreza Singapore Investment And Construction – SIIC, Unipessoal, LDA , hodi halo peskiza ba minerais non metáliku (kalkáriu ne’ebé mak uza ba produsaun simentu) iha Aldeia Soikili, Iparira, Moro, Ira-ara, Lai-ara, Suku Parlamentu, Munisípiu Lautem.
Lisensa ne’e atribui husi Sua Eselénsia Vise Primeiru Ministru, Mariano Assanami Sabino no Sua Eselénsia Ministru Petróleu no Rekursus Minerais, Francisco da Costa Monteiro, akompaña husi Sua Eselénsia MSSI, Verônica das Dores, Sua Eselénsia Secretáriu Estrado Jorge Cristôvão no Fernandino Vieira, Señor Prezidente Autoridade Lautem, Mélio de Jesus no entidade tutela iha MPRM, veteranu no autoridade lokál.
Prezidente Autoridade Nasionál Minerais, ANM, I.P., Rafael Danielson tenik katak, prospesaun no peskiza hanesan estudu detalladu, hodi identifika potensialidade, kuantidade no kualidade husi rekursus, hodi projeta ba explorasaun no komersializasaun.
Durante tinan hat, empreza SIIC sei halo mapeamentu jeolojia, rekolla amostra, hodi submete ba análize laboratóriu hodi hatene kompozisaun kímika ba produsaun simentu no mapeamentu jeofíziku ne’ebé foti husi subteráneu, hodi hatene sendimentasaun husi kalkáriu, nune’e bele halo explorasaun iha futuru.
Señor Jhon Sun, hanesan reprezentante empreza SIIC destaka kualifiaksaun husi empreza iha nível mundiál ba explorasaun minerál iha produsaun mapa jeolójiku subteraneu no tékniku kualifikadu iha kumprimentu padraun globál, kuadru legál no mos ambiental.
Sua Eselénsia Ministru Petróleu no Rekursus Minerais, Francisco da Costa Monteiro tenik katak, governu empeñadu iha intensifikasaun investimentu no promove rekursus naturais ne’ebé bele atrai investór sira, hodi halo explorasaun iha futuru ne’ebé sei iha efeitu multiplikador ba ekonomia, kria kampu servisu no apoia dezenvolvimentu infraesturas.
Sua Eselénsia Vise Primeiru Ministru, Mariano Assanami Sabinu tenik katak, orientasaun husi governu konstitusional da-sia ba MPRM mak buka no optimaliza rikusoin minerál no petróleu no investe iha rekursus humanu kualifikadu, hodi ajuda dezenvolvimentu nasionál.
Hodi garante susesu husi realizasaun atividade prospesaun no peskiza, Sua Eselénsia Vise Primeiru Ministru, MPRM, empreza SIIC husi Singapura no mos entidade tutela iha MPRM apela kontribuisaun husi entidade hotu iha Munisípiu Lautem ba atividade empreza nian.
Empreza Singapore Investment And Construction – SIIC, Unipessoal, LDA selesionadu liu husi konkursu internasionál, hodi halo peskiza ba bloku designadu, bazeia mapeamentu husi estudu ne’ebé realiza husi Autoridade Petróleu no Minerais – AMP (haketak ona ba ANM, I.P. no ANP, I.P.) IGTL, I.P. no mós Ministériu Petróleu no Rekursus Minerais. Dadaun ne’e, existe bloku 49 no governu atribui ona lisensa bloku 25 ba empreza nasionál no inteternasional, hodi halo prospesaun no peskiza.