Sua Eselénsia Ministru Petróleu no Rekursus Minerais, Francisco da Costa Monteiro akompaña husi Sua Eselénsia Vise Ministru Estatal, Jacinto Rigoberto, entidade tutela iha MPRM, Autoridade Munisípiu Baucau no ekipa veteranu, atribui lisensa ba empreza Taishengts Timor Lda no Nova Energy And Resources hodi halo atividade prospesaun no peskiza iha àrea Baucau Vila no Vemasse.
Empreza Nova Energy and Resources sei halo prospesaun no peskiza iha Suku Vemasse, Caicua, Ostico, Waigae no Uatulari, Postu Administrativu Vemasse, hodi halo estudu detalladu ba rekursus maganese. Empreza Taishengts Timor Lda sei servisu hamutuk ho empreza MURAK RAI TIMOR, E.P., hodi halo estudu detalladu ba kalkáriu, hodi halo produsaun ba bloku iha futuru iha àrea Kaisidu, ba bloku ne’ebé pertense iha Suku Trilolo no Triloka.
Iha faze prospesaun no peskiza, empreza sira sei halo mapeamentu jeolójiku, foti amostra hodi submete ba análize, mapeamentu jeofíziku ba amostra husi subteraneu, ho uzu ekipamentu subestikadu no waihira konfirma ona ninia potensialidade ba kalkáriu no maganese bele projeta ba explorasaun iha futuru.
Reprezentante empreza Nova Energy and Resources entusiazmu ba Timor-Leste nia potensialidade rekursus naturais no fiar katak, investimentu husi empreza sei estimula kresimentu ekonómiku uzu teknolojia avansada hodi reduz impaktu ambientál, promove talentu lokál no suporta komunidade ba assesu iha formasaun, edukasaun, saúde no infraestruturas.
Tuir Señor Prezidente ANM, I.P., Rafael Denilson, Timor-Leste Lei Mineiru ne’ebé sei regulariza fortemente atividade peskiza detallada, dezenvolvimentu no explorasaun rekursus mineirus no enseramentu minas iha futuru, hodi halo rekuperasaun ambiental, waihira prosesu explorasaun remata.
Relasiona ho koteúdu lokál, Señor Prezidente ANM tenik katak, iha faze inisiál sei iha oferta servisu ho eskala ki’ik, hanesan loke dalan no mos identifikasaun ba fatin ne’ ebé iha valór kulturál, maibé kuantidade sei aumenta maka’as waihira tama ona faze esplorasaun
Sua Eselénsia Ministru Petróleu no Rekursus Minerais, Francisco da Costa Monteiro elojia desizaun husi empreza Taishengts Timor Lda no Nova Energy And Resources, hodi investe iha Timor-Leste, maske nasaun seluk mos iha potensialidade rekursus naturais, tanba Timor-Leste iha sistema, leis no instituisaun forte, rekursus humanus kualifikadu iha marketing no prospetividade jeolójika ne’ ebé halo empreza sira fiar atu halo investimentu.
MPRM no entidade tutela hanesan ANM, I.P. kontinua empeñadu iha promosaun rekursus minerais, hodi dada investór sira atu investe iha Timor-Leste, hodi hamoris ekonomia lokál no fó rendimentu ba estadu.
Hafoin finaliza prospesaun no peskiza, Empreza Nova Energy Resources no Taishengts Timor Lda ne’ ebé servisu hamutuk ho Empreza MURAK RAI TIMOR, E.P., sei submete relatóriu ba governu kona-ba deskobrimentu iha terrenu, hodi foti desizaun kona-ba possibilidade explorasaun iha futuru