Governu atribui lisensa prospesaun no peskiza no lisensa ambiental ba empreza Tivan Limited husi Austrália, atu halo prospesaun no peskiza ba rekursus minerais metáliku hanesan osan mean no riti mean iha àrea konsesaun ho totál 344 km2, ne’ebé pertense ba Postu Administrativu Turiscai, Same, Fatuberliu no Alas iha Munisípiu Manufahi, Postu Administrativu Maubisse iha Ainaro, Munisípiu Ainaro no Postu Laclubar iha Munisípiu Manatutu.
Lisensa ba prospesaun no peskiza ne’e atribui husi Sua Eselénsia Primeiru Ministru, Kay Rala Xanana Gusmão, akompaña husi Sua Eselénsia Ministru Petróleu no Rekursus Minerais, Francisco da Costa Monteiro, Sua Eselénsia membru governu hanesan, MJ Sérgio Hornay, MSSI Verónica das Dores, MAPF Marcus da Cruz, VMAP Adérito Hugo, SEF Fernandino Vieria no SECOM Expedito Dias Ximenes autoridade lokál no entidade tutela iha MPRM.
Empreza Tivan Limited sei halo mapeamentu jeolójika hodi deskobre distribuisaun mineiru, mapeamentu jeofízika ho uzu ekipamentu moderna hodi hatene depozitu rekursus iha rai okos, halo perfurasaun hodi hatene klean rekursus metáliku no submete amostra ba análize laboratóriu, hodi hatene kualidade no kuantidade rekursus, nune’e bele projeta ba explorasaun.
Señor Prezidente Autoridade Nasionál Mineiru, Rafael Denilson Araújo argumenta katak, waihira kompaña ida submete ninia aplikasaun, hatene ona informasaun inisál kona-ba potensialidade rekursus minerais no waihira indika rezultadu pozitivu mak sei projeta ba explorasaun, komersializasaun, inklui reseitas ne’ebé estadu hetan husi projetu ne’e
Ba susesu husi implementasaun projetu ne’e, Señor Prezidente Exekutivu Empreza Tivan Limited, Grant Wilson tenik katak, investimentu husi empreza bele kontribui ba dezenvolvimentu ekonómiku, liu husi envolvimentu komunidade iha projetu no tane-as inkluzividade. Ba futuru, empreza sei halo explorasaun ba riti mean no osan mean iha Turiscai no waihira susesu iha prospesaun no peskiza mak, sei hari’i projetu rekursus minerais, hodi fó benefísiu ba Timor-Leste.
Sua Eselénsia Ministru Petróleu no Rekursus Minerais, Francisco da Costa Monteiro tenik katak, elojia eskolla husi Tivan Limited tanba, Austrália, Papua Nova Guiné, Illas de Salomão, Indonezia no seluk tan iha potensialidade ba rekursus naturais, maibé deside investe iha Timor-Leste tanba, fiar ba prospetividade jeolójika, konfia ba sistema, leis no mos kualidade atendimentu husi instituisaun estadu nian.
Tuir Sua Eselénsia Ministru Monteiro, atribuisaun lisensa ba prospesaun no peskiza ba empreza sira ne’ebé inisia tinan kotuk, refleta ba programa governu konstitusionál da-sia, hodi dezenvolve seitor seitor estratéjiku seluk, além de petróleu, hodi kontribui reseitas ba estadu no mos kria kampu servisu ba joven sira no iha impaktu sósiu ekonómiku ba sosiadade.
Sua Eselénsia Primeiru Ministru Kay Rala Xanana Gusmão tenik katak, waihira empreza halo prospesaun no peskiza ba rekursus minerais metáliku, komunidade no autoridade lokál tenke fó apoiu, hodi deskobre rekursu iha rai-okos, hodi explora iha futuru, waihira deskobre ona kualidade no kuantidade depozitu husi rekursus minerais.
Hafoin prosesu prospesaun no peskiza ba rekursus minerais hanesan riti mean no osan mean ne’ebé sei realiza durante tinan hat nia laran remata, empreza Tivan Limited sei aprezenta relatóriu kona-ba viabilidade téknika no komersiál ba governu, hodi foti desizaun kona-ba posibilidade halo explorasaun iha futuru.