Sua Eselénsia Ministru Petróleu no Rekursus Minerais, Francisco da Costa Monteiro, tersa-feira ne’e partisipa iha lansamentu aplikasaun APP husi Institutu Nasionál Seguransa Sosiál – INSS ne’ebé prezide husi Sua Eselénsia Primeiru Ministru, Kay Rala Xanana Gusmão.
Aplikasaun ne’ebé disponível iha playstore telemóvel, hafoin baixa (donwload) no instala iha telemovél, traballadór setór públiku no privadu bele assesu informasaun kona-ba dadus pessoais, situasaun husi kontributiva, prestasaun atribuída, situasaun profissionál, karreira kontributiva no bele halo simulasaun, kalkulasaun ba nia pensaun. INSS mos sei atribui kartaun ho barcode ba traballadór setór públiku no privadu no waihira scan bele asesu ba informasaun sira kona-ba seguransa sosiál.
Señor Prezidente INSS, Arlindo Pinto tenik katak, aplikasaun foun ne’e sei fasilita traballador sira atu asesu ba sistema seguransa sosiál no assegura sira nia futuru. Traballadór ne’ebé inskreve ba Seguransa sosiál kumpri obrigasaun kontributiva no iha direitu ba prestasaun ho natureza pekuniária, waihira iha situasaun hanesan maternidade, paternidade, adosaun, invalidez veliche no mate.
Ba Sua Eselénsia Primeiru Ministru, Kay Rala Xanana Gusmão, sistema seguransa sosiál sei garante futuru husi traballadór husi setór públiku no privadu waihira tama iha idade reforma no enfrenta difikuldade empregu.
Entretantu, Institutu Nasional Seguransa Sosiál – INSS hanesan instituisaun ho natureza servisu autónoma admnistrativu finanseiru no património próprio bazeia ba dekretu lei númeru 47/2016 de 14 de desembro ne’ebé kria INSS ho objetivu atu proteje traballador ho sira nia família bahira lakon rendimentu husi sira nia servisu.