Konsellu Ministru dekreta Lutu Nasionál, hodi simboliza tristeza ba falesimentu Santu Padre Papa Francisco iha loron 21 fulan Abril tinan 2025, tuku 7:35 dader iha Sidade Vatikanu.
Desizaun ne’e foti iha Reuniaun Extraordináriu Konsellu Ministru iha Tersa-Feira ne’ebé partisipa mos husi Sua Eselénsia Ministru Petróleu no Rekursus Minerais, Francisco da Costa Monteiro, dekreta katak, hahu tuku 10 dader loron 22 to’o loron28 fulan Abril kalan fahe rua, Bandeira Nasionál tenke hasae’e to’o klaran iha edifísiu públiku hotu-hotu, inklui embaixada, konsuladu no reprezentasaun sira seluk Estadu nian iha estranjeiru, no mós iha ró sira Estadu nian.
Governu destaka dever husi estadu nian no lori povu timoroan nia naran, hatudu sentidu gratidaun no rekoñesimentu ne’ebé boot, hodi presta omenajen ida ne’ebé merese ba Lider boot Igreja Katólika nian.
Exekutivu ne’ebé lidera husi Sua Eselénsia Primeiru Ministru Kay Rala Xanana Gusmão hato’o sentidas kondolénsia ba Igreja Katólika, ba Koléjiu Kardeál sira-nian, ba povu Arjentinu no ba sarani sira hotu iha mundu tomak, ba falesimentu Sua Santidade Papa Francisco, ne’ebé hanesan lider espirituál ida ho influénsia boot tebetebes ba umanidade, defensór ne’ebé lakole ba sira ne’ebé vulneravel liu no promotór dame, justisa no fraternidade nian entre povu sira.