𝐋𝐈𝐀 𝐍𝐀’ 𝐈𝐍 𝐇𝐔𝐒𝐈 𝐂𝐎𝐕𝐀𝐋𝐈𝐌𝐀 𝐇𝐔𝐒𝐔 𝐖𝐎𝐎𝐃𝐒𝐈𝐃𝐄 𝐄𝐍𝐄𝐑𝐆𝐘 𝐀𝐓𝐔 𝐀𝐉𝐔𝐃𝐀 𝐃𝐀𝐃𝐀 𝐊𝐀𝐃𝐎𝐑𝐀𝐒 𝐌𝐀𝐈 𝐓𝐈𝐌𝐎𝐑-𝐋𝐄𝐒𝐓𝐄

Lia na’ in husi Kamanasa, Munisípiu Covalima husu ba kompaña Woodside Energy atu ajuda konkretiza projetu dada kadoras husi kampu Greater Sunrise mai Timor-Leste, hodi dudu dezenvolvimentu ekonómiku iha Covalima no Timor-Leste nian.

Iha respesaun kulturál ba delegasaun husi Woodside Energy ne’ebé lidera husi Señora Vise Prezidente Exekutivu ba Tékniku no Dezenvolvimentu Enerjétiku Julie Fallon no Sua Eselénsia Ministru Petróleu no Rekursus Minerais, Francisco da Costa Monteiro ho ekipa iha uma lisan Uma Haemolin Kamanasa, lia na’ in Bei Lala no Bei Rai Ulun konsidera katak, indústria petrolífera husi Greater Sunrise importante ba povu nia moris no mos ba ekonomia nasaun nian.

Lia na’in Jorge Alves rekonese esforsu husi governu no empreza TIMOR GAP, E.P iha Covalima dezde tinan 2010, tanba ne’ e husu ba Woodside Energy atu apoia dezenvolvimentu Kosta Súl ne’ebé povu husi Covalima hein hela no fiar katak, vizita husi ekipa Woodside sei lori rezultadu pozitivu ba Timor-Leste.

Sua Eselénsia Ministru Petróleu no Rekursus Minerais, Francisco da Costa Monteiro tenik katak, Wooside Energy ne’ ebé hanesan operadór xavi ba Kampu Greater Sunrise hamutuk ho TIMOR GAP, E.P. no Osaka Gás no vizita iha Covalima atu haré infrastruturas fasilitadoras no mós rona aspirasaun husi lia na’ in no komunidade Covalima.

Vizita husi delegasaun Woodside, tuir Eselénsia Ministru Monteiro hanesan oportunidade furak, atu komunidade bele husu direta ba kompaña Woodside, hodi bele tulun no aselera implementasaun husi komponente importante sira iha Kosta Súl iha futuru.

Kona-ba pedidu husi veteranu no lia na’ in Kamanasa, Señora Vise Prezidente Exekutivu ba Tékniku no Dezenvolvimentu Enerjétiku Julie Fallon honradu ho vizita ne’e hodi rona aspirasaun husi komunidade.

Ba Vise Prezidente Wooside, vizita husi Seniór no ekipa téknika husi empreza petrífera ne’ e, manifesta interesse atu servisu hamutuk hodi dezenvolve Greater Sunrise ho koolaborasaun forte ho Ministériu Petróleu no Rekursus Minerais no TIMOR GAP, E.P. hanesan parseiru Joint Venture iha Kampu Greater Sunrise hamutuk ho Osaka Gás.