Resposta ba konvite husi Governu Ilha Solomon no tuir enkuadramentu inisiativa g7+, delegasaun altu nivél husi Timor-Leste, lidera husi, Sua Eselénsia Ministru Petróleu no Rekursus Minerais, Francisco da Costa Monteiro, partisipa iha semináriu ho titlu: Haforsa Parseria Rejionál liu-husi Aprezendisajen no Fahe Expriensia kona-ba Jestaun Rekursus Naturais.
Sua Eselénsia Ministru Monteiro, patisipa hamutuk ho instituisaun tutela iha Ministériu hanesan; Autoridade Nasionál Minerais (ANM), Murak Rai Timor (MRT), Inisiativa Transparénsia Indústria Ektrativa (EITI), no Institutu Jeosiénsia Timor-Leste (IGTL).
Semináriu ne’e ho diskurssu abertura husi Sua Eselénsia Ministru Francisco Monteiro ho hamutuk ho nia homólogu, Ministru Minas, Enerjia no Elektrifikasaun Rural Ilha Solomon, Derrick Rawcliff Manuari no Sekretáriu Jerál G7+, Helder Lopes. Iha intervensaun, Sua Eselénsia Ministru Monteiro subliña importánsia husi jestaun rekursus naturais no destaka esperiénsia Timor-Leste nian iha kriasaun kaudru legál no instituisionál, hodi asegura transparénsia, partisipasaun, no benefísiu tempu naruk husi rekursus naturais.
Semináriu ne’e inklui sesaun interativu kona-ba jestaun iha petróleu no minas, dezenvolvimentu indústria minerária, inisiativa transparénsia, no estudu jeolójiku, ho partisipasaun ativu husi instituisaun husi Timor-Leste no Ilha Solomon nian.
Eventu ne’e marka pasu signifikativu atu hakle’an kooperasaun entre Timor-Leste no Ilha Solomon, fornese plataforma valioza ba partila konhesimentu no eksplora dalan kolaborativu atu hadi’ak governasaun rekursus iha ekonomia frájil no tranzisaun.