Díli, 16 Fevereiru 2026
Sua Eselénsia Ministru Petróleu no Rekursus Minerais, Francisco da Costa Monteiro ho Sua Eselénsia Embaixadór Índia iha Timor-Leste, Madan Kumar Ghildiyal, Segunda-Feira ne’e, explora possibilidade kooperasaun iha setór petróleu no enerjétika.
Durante enkontru, Sua Eselénsia Ministru Monteiro aprezenta potensialidade no deskobrimentu seitór petróleu iha offshore hanesan Bayu Undan II, Greater Sunrise, Chudich, Kelp Deep, no área onshore iha Covalima no seluk tan, inklui minerais metáliku no naun metáliku ne’ebé dadaun ne’e iha faze propesaun no peskiza no explorasaun iha Munisípiu sira.
Sua Eselénsia Embaixadór Índia aprezenta kona-ba setór enerjétika, liu-liu konsumu internu ba petróleu no gás, husi produsaun interna no importasaun hanesan husi Rusia no seluk tan, no buka atu diversifika ho fontes enerjétika husi nasaun seluk. Relasiona ho senáriu ne’e, Sua Eselénsia Ministru Monteiro argumenta katak, Timor-Leste bele sai hanesan futura opsaun ba inisiativa diversifikasaun enerjétika Índia nian, liu-liu fontes mina no gás husi Bayu Undan, Greater Sunrise, Kelp Deep no seluk tan.
Relasiona ho projetu Tasi Mane, Sua Eselénsia Ministru Monteiro tenik katak, Timor-Leste nakloke atu ba investidór Índia, liu-liu ba projetu planta TLNG, refinaria no petrokímika no Sua Eselénsia Embaixadór Madan Kumar Ghildiyal, manifesta ninia disponibilidade atu partilla ho investidór sira husi Índia, hodi investe iha Timor-Leste liu-liu projetu assosiadu iha Bayu Undan II no Greater Sunrise.