Palásiu Governu, 13 Fevereiru 2026
Governu avalia pozitivamente operasaun helikoptru rua husi WESTSTAR-GAP AVIATION, hanesan subsidíariu husi TIMOR GAP, E.P. no empreza Weststar Aviation Service, Subsidiáriu husi Weststar Group, espesializada iha prestasaun servisu helikoptru iha transportasaun servisu na’in ba mina no gás, hodi tula tékniku no sasan husi Díli ba Plataforma Bayu Undan.
Hafoin akompaña Sua Eselénsia Primeiru Ministru, Kay Rala Xanana Gusmão hamutuk ho Sua Eselénsia Vise Ministru Komérsiu no Indústria, hodi hasoru malu ho delegasaun husi Weststar Group, Sua Eselénsia Ministru Petróleu no Rekursus Minerais, Francisco da Costa Monteiro konsidera katak, operasaun helikopru rua husi WESTSTAR-GAP AVIATION la’o ho susesu, ho durasaun voo horas rihun atus ida no la rejista insidente ruma.
Sua Eselénsia Ministru Monteiro tenik katak, governu, TIMOR GAP, E.P. no Weststar Aviation sei kontinua deskuti reforsu parseria, hodi projeta ba prestasaun servisu iha kampu Greater Sunrise iha futuru no mos ba dezenvolvimentu Kampu Bayu Undan II, ne’ebé empreza Santos no ANP, I.P., prepara hela kalendarizasaun no faze ba dezmantelamentu ba ekipamentu no komponente sira ne’ebé la nessesáriu ba futuru projetu, hodi transporta ba Tibar, Munisípiu Liquiça.
Na’in ba Weststar Aviation, Señor Syed Muhamad Azi Azman, konsidera produtivu enkontru ho Sua Eselénsia Primeiru Ministru ne’ebé akompaña husi Sua Eselénsia Ministru Petróleu no Rekursus Minerais, Francisco da Costa Monteiro no Vise Ministru Komérsiu no Indústria, Agusto Junior no subliña katak, operasaun husi WESTSTAR-GAP AVIATION husi fulan Janeiru tinan 2025 to’o agora, la’o ho susesu.
Dadaun ne’e, WESTSTAR-GAP AVIATION konta envolvimentu husi timor-oan na’in 26 hanesan pilotu helikoptru, tékniku no enjeñeiru, ho apoiu husi husi Aeroportu Internasionál Nicolau Lobato, Díli.