𝐗𝐈𝐍𝐀 𝐏𝐑𝐎𝐌𝐄𝐓𝐄 𝐑𝐄𝐅𝐎𝐑𝐒𝐀 𝐑𝐄𝐋𝐀𝐒𝐀𝐔𝐍 𝐁𝐈𝐋𝐀𝐓𝐄𝐑𝐀𝐋 𝐇𝐎 𝐓𝐈𝐌𝐎𝐑-𝐋𝐄𝐒𝐓𝐄

Sua Eselénsia Ministru Petróleu no Rekursus Minerais, Francisco da Costa Monteiro, partisipa iha selebrasaun loron fundasaun Repúblika Populár Xina ba dala 74 iha Embaixada Xina iha Díli.

Enkarregadu Negósiu iha Embaixada Xina, Xu Dayang reitera komprimissu atu hametin relasaun bilateral ho Timor-Leste iha área indústria, infraestruturas, auto sufisiénsia alimentar no seluk tan, no diplomata ne’e hein ho esperansa ba assinatura akordu kooperasaun “Belt and Road” iha tempu besik.

Sua Eselénsia Prezidente Repúblika, José Ramos-Horta, rekorda rekoñesimentu husi Xina ba Independénsia Timor nian no sai nasaun dahuluk ne’ebé estabelse relasaun diplomátika ho Timor-Leste, loron ida depois restaurasaun independensia, hodi kontinua apoia Timor-Leste, iha área infraestrutura, saúde, oferta bolsu estudu no seluk tan.

Kona ba kooperasaun estratéjika, Sua Eselénsia, Xefe Estadu rekorda enkontru históriku entre Sua Eselénsia Primeiru Ministru Kay Rala Xanana Gusmão ho Prezidente Xina, Xi Xinping foin lalais ne’e iha Xina, ne’ebé projeta ba futura kooperasaun iha revitalizasaun industriál, dezenvolvimentu infraestruturas, auto-sufisiénsia alimentár no hadi’a kondisaun moris sidadaun nian.