𝐓𝐋-𝐄𝐈𝐓𝐈 𝐇𝐎 𝐏𝐀𝐑𝐒𝐄𝐈𝐑𝐔 𝐒𝐈𝐑𝐀 𝐀𝐓𝐔𝐀𝐋𝐈𝐙𝐀 𝐒𝐄𝐑𝐕𝐈𝐒𝐔 𝐁𝐀 𝐌𝐏𝐑𝐌

Sekretariadu Extrative Industry Transparancy Iniciative Timor-Leste TL-EITI hamutuk Grupu Traballu Multisektorial (MSWG – Sigla iha Inglez) Tersa-Feira ne’e, atualiza servisu husi TL– EITI, ba Sua Eselénsia Ministru Petróleu no Rekursus Minerais, Francisco da Costa Monteiro.

Durante enkontru, ekipa TL-EITI aprezenta konkursu públiku hodi selesiona auditór internasional ne’ebé bele produz relatoriu TL-EITI ba tinan 2021 no rezultadu husi prosesu ne’e sei publika iha tempu besik. Entretantu, relatóriu TL-EITI tinan 2020 publika ona iha Dezembru tinan 2022 no dokumentu ne’e produz husi Administradór Independente Ernst & Young Audit & Associados – SROC, SA.

TL-EITI no Grupu Traballu Multisektorial ne’e, envolve husi Banku Sentral Timor-Leste (BCTL-Sigla iha Portuguéz), Ministériu Finansas, Instituisaun no empreza ne’ebé tutela iha Ministériu Petróleu no Rekursus Minerais, Sosiedade Sivíl no empreza petrolífera hanesan Wooside, Timor Resource, ENI, Sunda Gas no seluk tan.

Adopsaun husi Timor-Leste ba sistema EITI atu sinkroniza pratika internasional husi Extrative Industry Transparancy Iniciative ne’ebé engloba nasaun 57, hodi promove transparánsia no akuntabilidade iha uzu Fundu Petrolíferu – FP ba finansiamentu kada tinan ba mákina estadu nian, hodi hadi’a kualidade moris sidadaun nian.