𝗚𝗢𝗩𝗘𝗥𝗡𝗨 𝗛𝗨𝗦𝗨 𝗔𝗣𝗢𝗜𝗨 𝗛𝗨𝗦𝗜 𝗞𝗢𝗠𝗨𝗡𝗜𝗗𝗔𝗗𝗘 𝗕𝗔 𝗜𝗠𝗣𝗟𝗘𝗠𝗘𝗡𝗧𝗔𝗦𝗔𝗨𝗡 𝗣𝗥𝗢𝗝𝗘𝗧𝗨 𝗧𝗔𝗦𝗜 𝗠𝗔𝗡𝗘

Sua Eselénsia Ministru Petróleu no Rekursus Minerais, Francisco da Costa Monteiro, husu apoiu komunidade no autoridade Covalima ba implementasaun projetu Tasi Mane no explorasaun mineiru iha Cobalima iha futuru, hodi apoia ekonomia nasionál

Iha sosializasaun ba Programa Governu Konstitusionál da-sia ba dezenvolvimentu Kosta Súl iha Cobalima, Sua Eselénsia Ministru Monteiro mos haklaken ba komunidade kona-ba mudansa planta Gás Naturál Liquifeito – GNL husi Beaço ba Natarbora no refinaria no Petrokímika husi Betanu ba Natarbora, tanba adaptasaun ba nesesidade husi indústria no ekonomia nasionál.

Maibé, exekutivu kontinua fó atensaun máxima ba kriasaun sentru lojístika – Suai Supply Base no komponente balun hanesan Aeroportu Suai konstrui ona, Autoestrada no sei konstrui tan portu no mos fasilidade seluk, hodi apoia indústria ne’e.

Sua Eselénsia Ministru Monteiro tenik katak, fó ona orientasaun ba TIMOR GAP E.P., atu koolabora ho ANP I.P., Autoridade Navegasaun Aerea Timor-Leste – ANATL E.P. no kompaña Santos, hodi uza aeroporto Suai ba movimentasaun Helicoptru ba plataforma Bayu Undan, Greater Sunrise iha futuru seluk tan.

Ba tinan ida ne’e, Sua Eselénsia garante katak, perfurasaun posu mina-rai hanesan Liurai, Feto Kamaus no Lafaek, ne’ebé implementa ona iha tinan kotuk, husi Timor Resources sei kontinua hikas no sei iha tan perfurasaun foun iha final tinan 2024 ka tinan 2025.

Komandante PNTL Covalima, Superentidente Polísia, Calistro Gonzaga apela ba komunidade atu garante estabilidade no oferese sira propriedade ba estadu hodi garante implementasaun projektu Suai Supply Base, hodi apoia dezenvolvimentu ekonómiku.