Konsellu Ministru aprova iha Reuniaun Konsellu Ministru Kuarta-Feira ne’e, proposta ne’ebé aprezenta husi Sua Eselénsia Ministru Petróleu no Rekursus Minerais, Francisco da Costa Monteiro, kona-ba autorizasaun despeza no abertura prosedimentu aprovizionamentu ba servisu konsultoria iha jestaun projetu, atu superviziona dezeñu no konstrusaun auto-estrada Zumalai–Natarbora.
Dezpeza no prosedimentu ne’e kobre auto estrada husi Zumalai-Betanu (STA. 34+155 – STA. 59+767), ho valór dolar amerikanu millaun 12,97, Betanu- Uma Berloic (STA. 59+767 – STA. 85+259), ho valór dolar amerikanu millaun 12,97 no Uma Berloic – Natarbora (STA. 85+259 – STA. 110+787), ho valór dolar amerikanu millaun 12, 97.
Projetu ne’ebé enkuadra iha Projetu Tasi Mane, sai hanesan baze ba dezenvolvimentu petrolíferu nasionál, ho objetivu hamosu benefísiu ekonómiku direitu ba populasaun, liu-husi dinamizasaun indústria petrolífera, kriasaun kampu traballu ne’ebé iha relasaun no kontribui aumentu husi Produtu Internu Brutu – PIB, hodi promove dezenvolvimentu ekonómiku.
Durante reuniaun, Sua Eselénsia Ministru Monteiro, ne’ebé akompaña mos husi Prezidente ANP, I.P, TIMOR GAP, E.P., IGTL, I.P. no MURAK RAI TIMOR, E.P., atualiza mos atividade relasiona ho setór petróleu no minerais.
Iha setór petrolíferu, Sua Eselénsia Ministru Monteiro atualiza kona-ba planu dezmantelamentu kampu Bayu Undan no pontu situasaun hosi negosiasaun ho Austrália kona-ba dezenvolvimentu Greater Sunrise no inisiativa sira ne’ebé la’o hela ba prospesaun no abertura área esplorasaun foun, onshore (rai-maran) no offshore (tasi-laran).
MPRM mos aprezenta planu dezenvolvimentu kampu Kuda Tasi, Jahal no Chuditch, no mós perspetiva sira ba reabilitasaun kampu Bayu-Undan ba produsaun gás no atividade kaptura no armazenamentu karbonu (CCS – Sigla iha Ingléz), tanba ne’e destaka nesesidade reforsu investimentu iha Projetu Tasi Mane, inklui baze lojístika Suai no polu petrolíferu integradu Natarbora nian.
Ba setór mineiru, MPRM aprezenta kona-ba alkansu sira, ho énfaze ba reforsu kapasidade institusionál no inisiativa sira kona-ba estudu tékniku no sientífiku ba mapeamentu jeolójiku no prospesaun rekursus minerais no mós estabelesimentu parseria ba organizasaun baze-dadus jeosiénsia nasionál ida no kriasaun portál dijitál ida hodi divulga potensiál rekursus minerais no petrolíferus nian.
Atualiza mos planu konstrusaun Laboratóriu Jeosiénsia ne’ebé prevé implementa iha trimestre dahat tinan 2025.