Parlamentu Nasionál, 01 Juñu 2026
Proposta Orsamentu Orsamentu Retifikativu husi Ministériu Petróleu no Rekursus Minerais hodi assegura seguransa enerjétika, relasiona ho funu iha Médiu Oriente, aprovadu iha Parlamentu Nasionál iha espesialidade, ho votus afavór 42, kontra 0 no abstensaun 22.
Durante diskussaun, deputadu sira aprezenta preokupasaun kona-ba mekanizmu implementasaun subsídiu ba estabilizasaun presu kombustível iha merkadu, kontrolu ba presu kombustível no rezerva kombustível to’o final tinan 2026.
Sua Eselénsia Primeiru Ministru, Kay Rala Xanana Gusmão fundamenta katak, alokasaun dólar amerikanu millaun 42 ba estabilizasaun presu kombustível, bazeia ba relatóriu konsumu anuál husi Ministériu Petróleu no Rekursus Minerais, atu selu empreza importadora, nune’e bele fa’an kombustível tuir tabela ne’ebé define husi governu. Governu apela ba públiku atu keixa ba autoridade waihira deteka empreza ne’ebé mak fa’an kombustível liu presu ne’ebé determina, hodi prosesa tuir dalan legál.
Tuir medida temporária husi Governu, limite máximu ne’ebé fa’an ba konsumidór ba gazolina kada litru dólar amerikanu 1,50, dólar amerikanu 1,65 kada litru ba gazóleu, dólar 2,50 ba kombustível aviasaun no dólar 4,20 por kilograma ba Gás Petróleu Líkidu – GPL.
Medida ne’ebé governu avansa hodi mitiga impaktu direitu husi funu iha Médiu Oriente mak hanesan, alokasaun dólar amerikanu millaun 42 ba estabilizasaun presu kombustível, dólar amerikanu millaun 5 ba reforsu rezerva fós, ai-han bázika ba populasaun no fortalesimentu seguransa alimentar no dólar amerikanu millaun millaun 174,3 ba nesesidade produsaun eltresidade husi Sentrál Elétrika Hera, Betanu, Sacato no Ataúru ba fulan 7 no garante servisu essensiál sira.