Covalima-Suai, Kuarta-Feira, 27/Outubru/2021-Ministru Petróleu no Minerais, Dr. Victor da Conceição Soares, partisipa iha Serimónia Lansamentu Offisial Perfurasaun Mina Matan Fetok Maus, Suai.Sua Exélensia Primeiru-Ministru Taur Matan Ruak, akompaña hosi entidades relevalantes, Veteranus hosi Munisipiu 13, iha loron kuarta ne’e, iha Suai Múnisipiu Covalima, hala’o lansamentu ofisiál ba perfurasaun mina matan Fetok Maus, iha Suai Vila, ne’ebé mak halao hosi Kompãnia petrolífera Timor Resources, parseria ho Kompãnia Mina Estatal Timor-Leste nian, Timor GAP no hetan fiskalizasaun hosi Autoridade Nasionál Petróleu no Minerais (ANPM).Perfurasaun istóriku ida ne’e nu’udar orgullu no susesu bo’ot ida ba Estadu Timor-Leste iha era ukun rasik-an ne’e, tamba foin ba dahuluk hala’o perfurasaun iha rai-maran dezde restaurasaun independénsia 20 Maiu 2002.
Hafoin lansamentu refere, ekipa Sua Exélensia Primeiru-Ministru Taur Matan Ruak ho Ministru Petróleu no Minerais, Dr. Victor da Conceição Soares ne’ebé mak akompanha direitamente husi Komandantes Superior sira husi F-FDTL no Veteranus sira, kontinua ba iha sitiu perfurasaun Mina Matan Fetok Maus, no simu ho tebe dai tradisional kultura Suai nian, hodi kontinua ba halao abertura no lansamentu ba perfurasaun mina iha fatin refere, ne’ebé mak halao husi Kompanhia Timor Resources.Mina Matan Fetok Maus sei fura to rai okos ho metru 1040, no tuir prediksaun sei bele produz mina baril millaun 39.Diskursu husi Ministru Petróleu no Minerais, Dr. Victor da Conceição Soares, ba Perfurasaun Posu Feto Kmaus Matai, Suai, Covalima.27 Outubru 2021Excelentíssimos, Hau nian respeitu ba; – S.Exa. Primeiro-Ministru, Sr.Taur Matan Ruak- Exelensias Kolegas membrus Governu- Embaixadora Australia – Chefe Estadu Maior Maior General das F-FDTL Tenente General Lere Anan Timur – Vice Chefe Estadu Maior Maior General das F-FDTL Major General Falur Rate Laek- Brigadeiru General Maunana, Aluk, Sabika no koliati- Komodor F-FDTL Pedro Klamar Fuik – Koronel Maubuti no Amigu- Presidente Konselho Kombatentes Libertasaun Nasional Sr. Vidal de Jesus Riak Leman- Presidente Konselho Munisipal no veteranus sira hotu- Komandante Polisia Munisipiu Covalima no Ainaro- Administrador Munisipiu Covalima no Administrador Postu sira- Reverendu Pe. Paroku Suai- Xefe Sukus, Xefe Aldeias- Lia na’in sira iha rai Covalima nian tomak,- Representantes Ministerius, Institusoens, – Presidente/CEO Timor Gap no estrutura – Vice Presidente ANPM no estrutura – Presidente IPG no estrutura- Timor Resources – Gerasaun Patriota- Diretur Geral no Diretur Nasional sira- Komunidade local- Distintus Konvidadus tomak ne’ebe marka presensa iha ne’e, Ne’ebe hau respeitu, hau nian loron diak, Ohin loron ita hotu Mai halibur hamutuk iha Munisipiu Covalima – hola fatin iha Aero Portu Internasional Komandante Em Xefe Kayrala Xanana Gusmao ho objetivu ida atu mai asisti no sai sasin ba pasu importante no fundamental iha Istoria Timor-Leste.
Istoria foun no importante ne’e mak Lansamentu Dahuluk Perfurasaun mina iha Posu Feto Kmaus.
Perfurasaun ida ne’e marka istoria foun ho razaun katak tanba Posu Feto Kmaus mak sai nudar posu primeiru ne’ebe akontese iha rai maran (iha termu tekniku bolu Onshore), perfurasaun posu rai maran tamba ikus liu akontese iha tinan 50 liu ba.Hanesan ita hotu hatene katak,Timor Resources, nudar kompanhia Petróleo no gás Australiana, mak sai nudar operador ba perfurasaun Posu Feto Kmaus liu husi Kontratu Partilha Produsaun ba Bloku A – Munisipiu Covalima nian.
Kompania Timor Resources halo perfurasaun ne’e hamutuk ho nia parseiro ka Joint Venture ho Empresa Estatal Timor Leste nian, TIMOR GAP E. P.. Kompania Timor Resources sei realiza mos perfurasaun seluk iha Posu Liurai no Posu seluk tan iha Covalima no posu balun iha Municipio Ainaro no Manufahi.Autoridade Nasional ba Petroleo no Minerais (ANPM), nudar Institusaun publiku ne’ebe tutela ba Ministeriu Petroleo no Mienerais, durante ne’e hala’o nia kna’ar ou papel ho excelente nudar autoridade ida hodi jere no regula atividades hotu relasiona ho atividade explorasaun ne’e. Desde inisiu, ANPM halo kna’ar hodi avalia no halo aprovasaun ba PSC ou Kontratu de Partilha Petroleo, planu trabalho no planu finaseiru, deklarasaun impaktu Ambiental, Planu Jestão Ambiental no ikus liu emiti Lisensa Ambiental.Iha loron hirak ikus ne’e, ita mos asiste oinsa ANPM halo servisu Verifikasaun, Inspesaun ba ekipamentus instaladu, fo aceitasaun provisional ba safety case hodi atribui mos lisensa ba perfurasaun.
Servisu ne’e hotu ho objetivu esensial mak hodi garante katak atividades hotu-hotu relasiona ho explorasaun tenke kumpri leis no regulamentus sira hotu ne’ebe Timor Leste aplika no importante liu tenki kumpri mos padraun praktika indústria Petrolifera nian hodi garante katak explorasaun ne’e sei lao ho seguru, susesu no fo benefisiu masimu ba Timor Leste.Timor Gap, mak’a Empreza Estatal nudar parseiru Joint Venture ho Timor Resource ho total asaun montante pursentu 50. Hamutuk ho Timor Resources, Timor Gap hetan kontratu ba bloku explorasaun rua iha rai maran lokaliza iha Kosta Sul. Iha kontratu PSC ho Governu Timor Leste, atraves husi ANPM, Kompania rua halo ona kompromissu atu halo perfurasaun ba posu 3, posu 2 iha Covalima no posu ida besik Betano, iha baliza entre Ainaro ho Manufahi.Excelencias, Senhoras e senhores, ….Esforsu husi Ministeriu Petroleo no Minerais hamutuk ho nia nia institusaun Tutela hanesan ANPM, IPG no Timor Gap, mai ho objetivu prinsipal ida mak hodi haktuir visaun MPM nian atu
“Kontinua Dezenvolve no Jere Rekursu Petrolíferu no Minerais hodi Garante Dezenvolvimentu Ekonómiku Sustentavel”.
Adicionalmente, esforsu ne’e mos nudar realizasaun husi planu servisu longu prazu MPM nian hodi “Garante Dezenvolvimentu no Sustentabilidade Fundu Petróliferu, liu husi Estudu, Peskiza, Explorasaun, Produsaun, Exploitasaun no Diversifikasaun Investimentu iha Setor Petróleu no Mineiru iha area rai-maran, tasi-laran, rejime espesial Greater Sunrise nian iha rai-laran no rai-liur ho vizaun atu asegura katak Reseitas nebe mai husi husi atividades petroliferas no minerais kontribui ba ekonómia sosial, industrializasaun no dezenvolvimentu nasional”.Durante ne’e MPM, liu husi ANPM no Timor Gap, hala’o hela esforsu atu finaliza diskusaun sobre regime fiscais no regulamentus komplementarer atu bele dezenvolve kampu Greater Sunrise iha futuru. Maibe, iha tempu ne’ebe hanesan MPM mos iha esforsu paralelu atu bele hahu explora kampu ou rekursu potensiais seluk, tanto rekursu petrolifireu no minerais, iha rai laran hodi bele kontinua fornese rendimentu no garante sustentabilidade ba kofre estadu ba tempo naruk.Esforsu ne’e hatudu husi atividade perfurasaun husi Kompania Timor Resource ba posu 3 iha rai maran (onshore).
Iha tempu badak mos kompania Carnarvon sei halo perfurasaun ba kampu Buffalo ne’ebe lokaliza iha tasi laran. Dadaun ne’e Kompania Santos hamutuk ho nian parseiru sira halo perfurasaun adisionais ba kampu Bayu Undan, ne’ebe hatudu ona rezultadu diak ba posu 2 ne’ebe sira fura, ho ida ne’e sei aumenta tan produsaun husi kampu Bayu Undan, sei extende tan vida kampu nian ba tinan balun, e ikus liu sei aumenta tan rendimentu ba fundu petroleo Timor Leste.Ita mos espera katak, segunda promosaun blokus ba area potensiais husi ANPM sei susesu iha tempo badak, hodi bele atrai tan investidores ou kompania internasional seluk hodi mai investe no kontinua halo explorasaun ba ita nian rekursu iha rai maran no tasi laran. Esforsu ida neé mak agora dadaun Presidente ANPM no ekipa tomak halao promosaun iha fatin-barak iha rai liur hodi bele lori tan investores mai iha Timor-Leste.
Excelencias, Senhoras e senhores, ….Ita hotu iha esperansa bo’ot atu perfurasaun ohin, no perfurasaun rua tuir mai, bele fo resultadu positivu tuir ita hotu nian deseju atu bele kontinua estimula ita nian dezenvolvimentu nasaun ba tempo agora, no liu–liu ba ita nian gerasaun tuir mai. Ita nian tekniku sira iha ANPM no Timor Gap ezerse ona sira nian papel ho exelente to’o iha fase perfurasaun, Lia nain adat sira mos iha semana hirak liuba halo ona sira nian papel hodi husu matak malirin, kbi’it e beran ba ita nian bei ala, lulik no matebian sira, nune’e ita espera atu ita nian tekniku sira sei kontinua halo sira nian servisu perfurasaun ho didiak no seguru atu bele hetan susesu ne’ebe ita hotu espera. Molok atu konklui hau nian diskursu ne’e, hau hakarak aproveita oportuniade ida ne’e atu hato’o hau nia agradesimentu no hau nia apresiasaun ba entidades hotu ne’ebe kontribui ona desde inisiu to’o iha fase perfurasaun ida ne’e ba institusaun tutela sira, hau nian apresiasaun bo’ot ba ANPM no Timor Gap, inklui mos IPG, ba sira nian esforsu tomak hodi bele garante gestaun, administrasaun no involvementu ne’ebe professional tuir padraun iha praktika industria petroliferu nian. Ba autoridade lokal sira hotu husi Administrador Munispiu, Postu, Xefe Suku, Xefe Aldeia, Igreja, Lian Nain sira, Joven Feto no mane,Veteranus Nasional, Munisipal, autoriade seguransa (FFDL no PNTL), organizasoens lokal, no komunidades Covalima hotu ne’be durante ne’e halo koperasaun no kordenasaun servisu ho diak liu husi esforsu, apoiu no Tempu nebe oferese ba susesu programa ne’e. La haluha, hau hakarak atu hato’o mos apresiasaun bo’ot ba gestor Petroleo no Minerais sesante sira nia kontribusaun no esforsu hotu iha inisiu hodi konvida Kompania Timor Resource mai Investe iha setor Petroleo Timor Leste.
Governasaun atual, liuliu gestor iha seitor Petroleo no Minerais, kompremete hodi kontinua programa servisu hotu ne’ebe sei fo benefisiu maximu no kontribui ba dezenvolvementu ita nia nasaun.Hau hakarak mos agradese no fo apresiasaun bo’ot ba kompania Timor Resource ba sira nian komprimisiu tomak ne’be firme desde inisiu hodi hakarak halo investimentu iha Timor Leste. Hamutuk, espera ita bele atinji susesu ida ne’e be ita hotu hakarak iha perfurasaun ne’e, e espera mos iha futuru ita bele iha koperasaun servisu ida ne’ebe diak no metin liu tan. Ikus liu hau hakarak fo obrigado ba konvidadus hotu, espesialmente ba Excia. Jeneral Taur Matan Ruak, Primeiro-Ministro do Oitavo Governo Konstitusional, ne’ebe ho laran luak marka ona prezensa iha loron ida ne’e atu bele sai sasin ba loron historiku no importante ba ita nian rain Timor Leste.
