Viqueque, Sexta-Feira, 26/Novembru/2021-Ministru Petróleu no Minerais Dr. Victor da Conceição Soares hamutuk ho komitiva MPM, TIMOR GAP, ANPM, IPG, Reprezentantes husi Komandu F-FDTL no PNTL hodi halao dialogu no sosializasaun ho Autoridades ne’ebé mak kompostu husi elementu Lideransa Komunitaria, no mos Veteranu, Juventude, Estudantes no Komunidade sira, ligadu ho planu Governu hodi konstrui Planta LNG iha Beaço, atu nune’e bele dada kadoras husi kampu Greater Sunrise mai área Beaço, Viqueque.
Ministru Petróleu no Minerais Dr. Victor da Conceição Soares durante ninia aprezentasaun, akresenta katak “Ne’e primerives iha hau nia mandatu, mai iha Munisipiu viqueque hodi koalia kona-ba setor petróleu no minerais, oin nusa’a politika governu nian hodi jere petróleu, gas no minerais iha ita nian rai laran, hodi sustentabiliza ita nia ekonomia, ne’ebé mak nu’udar setor estratéjiku hodi sustenta ita nia estadu no vida povu nian”.Ministru Petróleu no Minerais mos sublinha katak, “Polítika ne’ebé mak Ministériu Petróleu no Minerais ho Instituisaun tuteladas sira trasa dadaun ne’e, hodi kontinua garante futuru povu nian, no vida estadu nian, laos atu fo benefisiu ba deit ema ida ka grupu ida ka partidu ida, maes ba bem estar povu nian no ba jerasaun foun sira nia futuru”.Durante dialogu refere, Ministru Petróleu no Minerais, entrega mos Relatoriu servisu no Buletin Ministériu Petróleu no Minerais nian ba Lideransa Komunitaria no funsionarius públiku sira, hodi bele le no assesu ba imformasaun kona-ba atividades servisus no sussesu mak durante ne’e MPM atinji ona.
Durante dialogu no sosializasaun ne’e, Brigadeiru Jendral Sabika Besi Kulit nu’udar Reprezentante husi Komando F-FDTL, apela ba komunidade sira atu kria estabilidade, atu nune’e bele ajuda Governu halao dezenvolvimentu iha área Beaço, liu-liu kona-ba planu konstrusaun Planta LNG iha Beaço.Iha fatin hanesan, Koronel Maubuti nu’udar mos Reprezentante husi Komando F-FDTL, husu mos ba komunidade sira atu kontribui no koopera ho Estadu, no Koronel ne’e senti kontente tamba komunidade sira ho laran kaman no disponivel ona, hodi konkorda atu kadoras dada mai Beaço, tan nee konvida parte Governu sira atu mai halo sosializasaun iha fatin refere, no ba oin tenki neon ida laran ida hamutuk ho Governu kontribui ba dezenvolvimentu, akresenta Koronel ne’e.Durante dialogu refere, Prezidente no CEO Timor Gap, Eng. António José Loiola de Sousa, apela ba Komunidade sira atu kolabora hamutuk ho ekipa Timor Gap hanesan Timor-oan ho objetivu ida deit, katak kadoras tenki dada mai área Beaço, tamba Governu investe barak tiha ona ba estudu no planu konstrusaun Planta LNG iha Beaço, ho objetivu ida hodi hadia povu nia moris no dezenvolve nasaun Timor-Leste.Reprezentante Jerasaun patriota mos hola parte iha dialogu ne’e, hodi husu atu komunidade Beaço kolabora ho Estadu atu bele dada kadoras mai Beaço, no tenki tau fiar ba Tékniku sira, atu halo sira ninia kna’ar ba misaun refere.
Komisariu Juvinal Dias iha ninia intervensaun ba programa dialogu no sosializasaun ne’e, sublinha mos kona-ba kna’ar Komisarius sira nian, fundamental liu mak atu reprezenta Governu Timor-Leste, hodi bele avalia no superviziona no halo analís ekonómiku tékniku sira inklui administrasaun sira ne’ebé mak aprezenta husi konsorsium ida naran Greater Sunrise nian, ne’ebé mak Timor-Leste sosa tiha ona asõens 56%, ne’e mak servisu balun Komisarius sira sei halo, hodi reprezenta Governu no Povu Timor-Leste nia interese, akresenta Komisariu Juvinal Dias, durante dialogu ho komunidade iha Beaço.Durante halao sosializasaun ne’e, Vise Prezidente IPG, Eng. Oktoviano Tilman M.Sc mos iha ninia aprezentasaun sita mos kona-ba oin nusa atu minimiza risku jeologia wainhira dada kadoras mai iha Beaço, tan ne’e tenki halo estudu tékniku jeologia detalhadu no komprensivu hodi bele minimiza riskus hirak ne’e wainhira hari’i Planta LNG iha Beaço.Reprezentante Prezidente ANPM mos iha fatin hanesan, hato’o sira ninia aprezentasaun tékniku ne’ebé mak pertinente, kona-ba kna’ar no servisus ANPM nian durante ne’e nu’udar Orgaun regulador no Autoridade ba Petróleu no Minerais iha Timor-Leste.Durante Ministru Petróleu no Minerais Dr. Victor da Conceição Soares hamutuk ho komitiva MPM, TIMOR GAP, ANPM, IPG, Reprezentantes husi Komandu F-FDTL no PNTL halao dialogu no sosializasaun ho Autoridades ne’ebé mak kompostu husi elementu Lideransa Komunitaria, no mos Veteranu, Juventude, Estudantes Universitariu no Komunidade Viqueque sira, mayoria Komunidade no partisipantes sira, konkorda hodi koopera hamutuk ho Governu atu realiza planu refere.
