ANPM OHIN NO FUTURU
Prezidente ANPM
Nu’udar Prezidente ANPM, ne’ebé másimu mandatu ida ne’e fulan tolu (3) liuba atravez husi desizaun Konsellu Ministru, hau iha esperansa katak ANPM sei kontiñua hala’o ninia kna’ar ho profisionalizmu ne’ebé a’as no dedikasaun tomak ba povu nia di’ak. ANPM ninia ezistensia desde inisiu iha 2008, sai ona autoridade reguladora ne’ebé mak ho tempu hatudu ona dezempeñu no prestasaun servisu ne’ebé di’ak tebes no hetan ona konfiansa husi entidade barak inklui governu Australia rasik. Alkansu hirak ne’e tanba rekursu umanu ANPM nian ne’ebé tane a’as valor sira no étika serbisu ne’ebé di’ak tebes.
Rekursu Umanu ANPM nian sai hanesan elementu no pílar importante no sentral iha susesu tomak instituisaun ida ne’e ba tempu naruk no sei kontiñua mantein ba tempu lubuk barak ne’ebé iha oin. ANPM durante tinan 2020, mesmu ho pandemia COVID-19 no impase polítika, atividade tomak ANPM nian maioria atinje ho progresu ne’ebé di’ak. ANPM iha esforsu barbarak atu buka alternative sira hodi kontiñua garantia sustentabilidade husi reseita sira ne’ebé fo nafatin esperansa ba estadu hodi kontiñua hala’o konstrusaun estadu no dezenvolvimentu ekonomiku ne’ebé di’ak. Esforsu hirak ne’e kontempla iha serbisu maka’as ne’ebé ANPM halo ho promosaun bloku 18 hodi atrai investor sira husi rai liur atu mai investe iha Timor-Leste iha setór petróleo. ANPM mós pro-ativamente hala’o sosializasaun Dekreitu Lei No. 18/2020 kona-bá operasaun petrólifera iha rai maran (onshore) ba Munisipiu hotu-hotu iha Timor-Leste laran. Hatu’ur no kontiñua garante lei tomak sira implementa ba setór Upstream, Downstream no Minerais. ANPM mós finaliza estudu no peskiza sira balun iha setór minerais nian foka liu ba minerais non-metaliku iha fatin balun iha teritoriu Timor-Leste laran. ANPM mós lori ona Kodigo Mineiru hodi hetan aprovasaun ona iha jeneralidade iha parlamentu. Apesar de atividades ne’ebé mensiona iha mós atividade lubuk barak.
