Dili, Kuarta-Feira, 30/Junhu/2021-Ministru Petróleu no Minerais, Dr. Victor da Conceição Soares, hamutuk ho membrus VIII Governu Konstitusionál, partisipa iha reuniaun Konsellu Ministrus Extraordinariu, ne’ebé mak prezidi husi Sua Exélensia Primeiru Ministru Taur Matan Ruak, iha Palásiu Governu.
KOMUNIKADU IMPRENSA
=====================
Sorumutu Konsellu Ministrus Extraordinariu nian iha loron 30 fulan Junhu tinan 2021 Konsellu Ministrus hala’o sorumutu iha Palásiu Governu, iha Dili, no, hafoin análize ba aprezentasaun kona-ba pontu situasaun epidemiolójika iha munisípiu Baukau no Dili, husi Sala Situasaun, husi Sentru Integradu Jestaun Krize, delibera hodi aprova projetu sira Rezolusaun Governu nian ne’ebé mantein impozisaun serka sanitária iha Munisípiu sira hanesan Baukau no Dili, to’o finál vijénsia husi períodu estadu emerjénsia, to’o tuku 23:59 husi loron 1 fulan-jullu tinan 2021. Aban, iha sorumutu ordinária Konsellu Ministrus nian, sei analiza fila fali posibilidade kontinuidade impozisaun serka sanitária iha munisípiu rua ne’e. Nune’e, bandu nafatin sirkulasaun ema sira-nian entre munisípiu Baukau no Dili no sirkunskrisaun administrativa sira-seluk, exetu iha kazu hirak ne’ebé ninia fundamentu forte tamba razaun sira seguransa públika, saúde públika, asisténsia umanitária, manutensaun sistema abastesimentu públiku ka razaun seluk ne’ebé presiza atu hala’o ba interese públiku nian. Sidadaun ne’ebé komprova vasinasaun kompleta (doze rua) kontra COVID-19 la inklui iha proibisaun ida-ne’e, no mós labarik ho idade tinan 6 mai kraik ne’ebe akompaña. @MÉDIA MPM@
