Ministru Petróleu no Minerais, Dr. Victor da Conceição Soares, akompanha husi Prezidente Konsellu Administrasaun Timor Gap, E.P., (Timor Gas no Petróleu, Empreza Públika), Eng. António José Loiola de Sousa no Ekipa Téknikus husi Timor Gap, Prezidente ANPM, Eng. Florentino Mateus Soares Ferreira, Prezidente IPG, Eng. Gabriel Aparício no ekipa, halao dialogu no sosializasaun kona-ba progressu servisus sira husi Ministériu Petróleu no Minerais hamutuk ho Instituisõens tuteladas ANPM, TIMOR GAP no IPG, no halo mos atualizasaun informasaun kona-ba Projetu Tasi Mane ba Komunidade no Autoridade Lokal iha Betano, Munisipiu Manufahi.
Programa dialogu no sosializasaun refere, hodi partilha informasaun lolos kona-ba Seitor Petróleu no Minerais ninian, ligadu mos ho lalaok husi implementasaun Projetu Tasi Mane. Liu husi sosializasaun refere, hodi hato’o imformasaun detailhu no kumpletu ba komunidade sira, hodi bele akompanha Planu no Programa tomak husi Ministériu Petróleu no Minerais ho Instituisaun tutelada TIMOR GAP, ANPM no IPG nian ba dezenvolvimentu aréa Petróleu, Minerais no Gas.
Iha Programa Dialogu no Sosializasaun ne’e, Sua Exelénsia Ministru Petróleu no Minerais, Dr. Victor da Conceicão Soares, aprezenta kona-ba progressu servisu sira ne’ebé mak atual Oitavo Governu Konstitusional atinji ona to’o ohin loron liu husi Ministériu Petróleu no Minerais.Prezidente ANPM, Eng. Florentino Mateus Soares Ferreira, aprezenta kona-ba progressu servisus ANPM nian, nu’udar Autoridade Reguladora ba seitor Petróleu no Minerais iha Timor-Leste.Prezidente ANPM mos atualiza kona-ba Projetu Tasi-Mane ninia konseitu ne’ebé mak konsideradu nu’udar “Projetu ne’ebé mak la tuir padraun industria petrolifera”, tamba governu anterior la desenvolve konseitu ida mak bazeia ba padraun internasional ba industria petroliferu ne’ebé mak adopta iha mundu. Prezidente ANPM aprezenta mos ba autoridade lokal no komunidade sira kona-ba “Konseitu Foun” ne’ebé mak adopta padraun Petroliferu internasional, no atualmente sei iha faze diskusaun, atu bele konsidera hodi aplika iha Timor-Leste, liu-liu seitor Petroliferu iha parte Tasi Mane, hodi nune’e tuir aspeitu tékniku no komersial, sei oferese benefisiu másimu ba povu no estadu.
Prezidente TIMOR GAP, Eng. António José Loiola de Sousa, iha ninia aprezentasaun, transmiti informasaun sira relasiona ho progressu servisu sira ne’ebé mak TIMOR GAP atinji ona to’o ohin loron. Relasiona ho Projetu Tasi Mane, Prezidente TIMOR GAP akresenta katak, refere ba padraun internasional iha seitor Petroliferu, projetu hotu tenki inisia uluk husi parte Upstream, mai Mid-stream hafoin mak to’o mai parte Downstream. Signifika katak, Projetu Tasi Mane presiza asegura, katak governu tenki hatene uluk reserva Petroliferu hira mak existi iha Tasi laran no Rai maran, atu nune’e tuir mai bele aplika Projetu Tasi Mane ida ne’ebé mak sei fo benefisiu másimu ba povu no estadu. Ho nune’e, redefinisaun ba Projetu Tasi-Mane sei aprezenta ba governu atu konsidera ba exekusaun. Relasiona ho Projetu Greater Sunrise, Prezidente TIMOR GAP hato’o katak, Governu anterior sosa asõens husi ConocoPhillips no Osaka Gas ho montante total $651.7 milloens. Osan refere $650 Milloens mai husi Imprestimu ne’ebé TIMOR GAP deve direita husi Banco Federal America, no $ 1.7 Milloens Mmai husi fundus TIMOR GAP nian ne’ebé mak tinan-tinan hetan alokasaun atraves OGE. Liu husi imprestimu ne’ebe mak exekutivu TIMOR GAP anterior halo, TIMOR GAP atualmente tenki selu ho funan 4.5% annual compound hahu’u husi tinan 2019, katak hahu’u husi 19 Abril 2019, kompanhia subsidiariu ba TIMOR GAP, Greater Sunrise tenki selu rihun $82,500 kada loron ida. Prezidente TIMOR GAP mos aprezenta katak, TIMOR GAP agora dadaun servisu maka’as hodi halo negosiasaun ba Projetu Greater Sunrise ho ninia Parseiru Woodside no Osaka Gas, ho prinsipiu ida katak Projetu Greater Sunrise tenki fo benefisiu másimu ba povu no estadu.
Iha fatin hanesan, Prezidente IPG iha ninia aprezentasaun, aprezenta kona-ba progressu servisus ba peskiza sientífiku, sira ne’ebé mak IPG hala’o ona, iha seitor Petroliferu no Geologia, inkluindu servisu sira relasiona ho peskiza ba Minerais, servisu identifikasaun riskus Geotékniku no hidrologia. Programa refere, hetan apresiasaun diak tebes husi Komunidade no Entidades relevantes hanesan Lider Komunitaria, Administrador Munisipiu, Juventude, Veteranus, membrus PNTL no F-FDTL sira mak marka prezensa iha Programa Dialogu no Sosializasaun ne’e.Hafoin konklui Programa refere, Ministru Petróleu no Minerais, Dr. Victor da Conceição Soares, akompanha husi Prezidente Konsellu Administrasaun Timor Gap, E.P., (Timor Gas no Petróleu, Empreza Públika), Eng. António José Loiola de Sousa no Ekipa Téknikus husi Timor Gap, Prezidente ANPM, Eng. Florentino Mateus Soares Ferreira, Prezidente IPG, Eng. Gabriel Aparício no ekipa, entrega Relatoriu 100 dias no Boletín Ministériu Petróleu no Minerais ba entidades relevantes sira, hodi bele asesu ba informasaun husi atividades no sussesu tomak mak Ministériu Petróleu no Minerais ho Instituisaun tutelada TIMOR GAP, ANPM no IPG halao no atinji ona.
