Samalari, Tersa-Feira, 05/Outubru/2021-Ministru Petróleu no Minerais, Dr. Victor da Conceição Soares, akompanha husi komitiva Ministériu Petróleu no Minerais, hamutuk ho Autoridade Lokal no ekipa saúde sira, halao Kampaña Nasional Faze Segundu ba Vasinasaun Kontra Covid-19, iha Suku Samalari, Aldeia Desagua, Postu Administrativu Laga, Munisipiu Baucau.
Ministru Petróleu no Minerais, Dr. Victor da Conceição Soares, iha ninia intervensaun ba Kampaña Nasional Faze Segundu ba Vasinasaun Kontra Covid-19 ne’e, fo parabéns ba kontribuisaun husi populasaun sira ninia partisipasaun no konsensia hodi mai simu vasina, tamba governu Timor-Leste halao ona esforsu maximu no investe fundus ba kombate surtu covid-19, hodi proteje Povu, laos atu estraga ninia povu rasik, maibe hodi salva vida povu nian husi surtu covid-19 ne’ebé mak hamate ona ema barak iha mundu tomak.
Ministru Petróleu no Minerais mos husu ba populasaun iha Suku Samalari, atu labele rona notisia hoax ka falsu kona ba covid-19, ne’ebé mak espailhadu iha media sosial, hodi bosok povu, no dezvia povu hodi lakohi mai partisipa iha Programa vasina, ne’ebé mak governu realiza liu husi Ministériu Saúde, no fo hanoin ba komunidade sira hodi hakbesik-an mai vasina, hodi bele hasae sira ninia imunidade isin nian, hodi bele kombate hasoru virus covid-19.
Dr. Victor da Conceição Soares mos fo agradesementu ba ekipa saúde ne’ebé mak halo ona sakrifisiu no esforsu lubun ida, hodi kontinua atende povu sira atu bele simu vasina kontra covid-19, no louva mos kolaborasaun husi Autoridade Lokal sira, hodi kontinua kontribui no konvense populasaun sira atu mai simu vasina kontra covid-19.Iha fatin hanesan, Administrador Postu Laga iha ninia intervensaun, sublinha katak, ” Husi total populasaun 11 mil resin, ne’ebé mak simu ona vasina hamutuk 4000 mil resin, no ne’ebé mak seidauk simu vasina, hamutuk 6000 mil resin”.
Tuir orariu ne’ebé mak desididu ona, Ministru Petróleu no Minerais, Dr. Victor da Conceição Soares, sei akompanha husi Ekipa husi Ministériu Petróleu no Minerais no Autoridade Lokal ho ekipa saúde sira, sei kontinua halao Kampaña Nasional Faze Segundu Vasinasaun Kontra Covid-19, iha Postu Administrativu Laga no Quelicai, Munisipiu Baucau, hahu’u husi loron 5 Outubru 2021 to’o loron 11 Outubru 2021, hafoin Ministru Petróleu no Minerais ho Komitiva termina Programa Kampaña refere, mak ekipa segundu husi Ministériu Petróleu no Minerais, sei desloka husi Dili, hodi mai kontinua hikas akompanha Vise-Ministru Administrasaun Estatal, Sr. Lino de Jesús Torrezão, hodi kontinua halao Kampaña Nasional Faze Segundu Vasinasaun Kontra Covid-19, hahu’u husi loron 11 Outubru to’o loron 15 Outubru 2021.
