Ainaro, Sexta-Feira, 19/Novembru/2021-Ministru Petróleu no Minerais, Dr. Victor da Conceição Soares, hamutuk ho membrus VIII Governu Konstitusionál, no akompanha husi ekipa MPM, TIMOR GAP no IPG, partisipa iha Diálogu Komunitária entre Prezidente Repúblika ho Komunidade Munisipiu Ainaro, mak hanaran Programa Dada Lia ho Lu Olo, ho tema ” Ho Diálogu Sei Hetan Solusaun Ba Problema Ne’ebé Deit “.
Ministru Petróleu no Minerais, Dr. Victor da Conceição Soares, iha ninia intervensaun durante diálogu komunitária ne’e, sublinha katak sei kontinua jere no dezenvolve sustentabilidade fundus petrolíferu, no hamutuk ho Instituisaun tutelas sira, sei dezenvolve setor petróleu no gas husi upstream mai downstream, no dadaun ne’e sei kontinua esforsu hela hodi estabelese kompanhia mineirus iha tempu badak ne’e, no mos sustentabiliza fundus petróliferu, liu husi halao perfurasaun ba mina iha tasi laran no rai maran, ho estratejia no planu ne’ebé mak MPM hamutuk ho ninia Instituisaun Tuteladas sira planeia tiha ona, no dadaun ne’e kontinua implementa, atu bele atinji objetivu ho sussesu ba oin.
HUSI DIÁLOGU PREZIDENTE REPÚBLIKA DIRIJI MENSAJEN BA POVU NO HALA’O KNA’AR POLÍTIKU TUIR KONSTITUISAUN RDTL
Prezidente Repúblika, Francisco Guterres Lú Olo, konsidera diálogu ne’ebé nia halo ho entidades oioin iha vizita munisipiu tama iha kontestu ida ne’ebé konstituisaun Republika Demokrátika Timor-Leste (RDTL), fó ba Xefe Estadu atu dirije mensajen ba povu, aleinde atu informa lala’ok ukun nian no rona povu nia hanoin sira.Prezidente Republika hato’o ida ne’e ohin, iha diálogu hanaran “Dada-lia ho Lú Olo”, ho povu Munisipiu Ainaro iha Salaun Parokial Ainaro.“Dialogu Prezidente-da-Repúblika nian monu tama ba kontestu ida ne’ebé konstituisaun rasik fó ba Prezidente-da-Repúblika para atu dirije mensajen ba povu, atu dirije mensajen mós ba Parlamentu Nasionál atu bainhira karik nia uza nia kompeténsia para atu vota diploma ruma ou lei ruma, haruka fila fali ba Parlamentu, tenki ba ho razaun fundamentada. Ne’e mós hola parte hotu mensajen Prezidente nian. Ida ne’e hola parte kna’ar polítika Prezidente-da-Repúblika ou funsaun polítika Prezidente-da-Repúblika ninian. La’os funsaun polítika partidu nian. É funsaun polítika-du-Estadu ne’ebé Xefe Estadu asumi nu’udar ninian rasik para atu bele ko’alia ho ninia povu tomak. Tanba ne’e hori nanis kedas maka ami hahú programa ida ne’e. Dadalia ho ita-nia populasaun sira iha munisipiu sira seluk”, esplika Prezidente Francisco Guterres Lu Olo.Xefe Estadu informa, vizita no diálogu ne’ebé nia halo iha Munisípiu Manufahi no Ainaro tuir loloos halo ona iha fulan-agostu maibé tanba razaun pandemia Covid-19, diálogu ba munisipiu rua foin bele realiza iha fulan ida ne’e. “Ainaro ho Manufahi hein hori nanis tiha kedas. Mas tanba moras aat ne’ebé maka se la’o iha ita-nia leet, halo ita dook ba malu oituan. Iha tempu ne’eba, ami labele hiit-an mai para hamutuk ho imi hanesan mós ita-boot sira hotu.
Ita labele halibur malu hanesan ohin iha fatin ida ne’e, tanba moras COVID-19 iha hela ita-nia rain. Moras aat ida ne’e maka hadook ita ba malu maibé la fahe malu ita ida. La fahe Prezidente Republika ho nia povu ida ne’e.Tamba ne’e ohin hamutuk fila fali ho imi Ainaro oan sira ho ita-boot sira, autoridade sira hotu, ho haksolok boot tebetebes”, afirma Prezidente Repúblika ne’ebé tuir mai akresenta: “Diálogu ho Prezidente-da-Repúblika ida ne’e atu ita bele hato’o lia ba malu, husi imi mai Prezidente-da-Repúblika i husi Prezidente-da-Repúblika mós ba ita-boot sira hotu, atu nune’e, ita hotu atu hatene tuir nafatin lala’ok ukun ninian iha ita-nia rain. Atu ita hotu bele hamutuk oinsá mak ita bele hateke ba futuru. Atu rezolve dadauk problema ne’ebe iha ita-nia oin i hodi hakat ba futuru”.
Xefe Casa Civil Prezidénsia Repúblika, Francisco Maria de Vasconcelos ne’ebé sai moderadór iha diálogu Xefe Estadu ho povu Ainaro, iha introdusaun molok hahú diálogu informa atividades hanesan, hala’o ona iha munisípiu neen seluk hanesan Viqueque, Covalima, Lautém, Ermera, Baucau no Manufahi. Tuir Xefe Casa Civil, aleinde diálogu, integra mós iha programa bainhira Xefe Estadu vizita munisípiu mak atividade sira hanesan Konsulta ka asisténsia médika no Kampaña Nasionál kuda ai-oan, “Sidadaun ida, Ai-Oan Ida” ne’ebé saimós hanesan kompromisu polítiku Prezidente Francisco Guterres nian, ne’ebé lansa iha inísiu 2019.Xefe Casa Civil informa, programa konsulta médika ne’ebé halo ona iha Munisípiu Ainaro ba pasiente hamutuk 851, kompostu husi veteranu 37 no ba komunidade hamutuk 314. Programa Konsulta médika no kuda ai-oan realiza mós iha munisipiu neen ne’ebé Prezidente Repúblika vizita ba.
Iha diálogu ne’ebé partisipa husi komunidade husi Postu Administrativu haat iha Ainaro: Ainaro Vila, Hatubuilico, Hatudo no Maubisse ne’e, marka mós prezensa Vise Primeira Ministra no Ministra Soliedaridade Sosiál no Inkluzaun, Armanda Berta, Ministru Petróleu no Minerais, Ministra Saúde, Ministru Turizmu, Komérsiu no Industria, Ministru Edukasaun, Juventude no Desportu, Ministru Agrikultura no Peskas, Ministru ba Asuntus Kombatentes ba Libertasaun Nasionál, Sekretáriu Estadu Formasaun Profesionál inklui reprezentante husi Embaixada Cuba no Ajénsia Internasionál balu.
