Hera, Tersa-Feira, 14/Dezembru/2021-Ministru Petróleu no Minerais, Dr. Victor da Conceição Soares, partisipa iha atividade 2020-2021 Institutu Petróleu no Geolójia (IPG) update ba área rekursus jeolójiku no riskus jeolójikus ba sustentabilidade dezenvolvimentu iha Timor-Leste.Hanesan Instituisaun públika ne’ebé mak halao estudu no peskiza iha área rekursus jeolójiku, riskus jeolójikus no mós hidrojeolójiku iha teritóriu Timor-Leste, tamba IPG iha responsabilidade moral no profesional hodi aktualiza progresus servisus sira ba públiku, kada tinan no depende ba nesesidade iha tinan ida-idak. Objetivu husi atividade refere, atu divulga no disemina informasaun ba públiku kona-ba progresu servisus IPG nian, husi periodu tinan 2020 to’o 2021, ne’ebé mak sei halao durante loron rua, husi 14 to’o 15 Dezembur 2021 iha Auditóriu Fakuldade Engenharia Siênsia no Teknólojia UNTL, Hera.
Diskursu Ministru Petróleu no Minerais ba atividade IPG Update Tinan 2020-2021
Presidente IPG no Vice IPG,
Carissimos konvidadus hotu ne’ebe hau respeita,
Hau nian loron diak,Desde semana kotuk e nune’e mos semana ida ne’e, membru governo tomak tenke partisipa iha Parlamentu Nasional hodi akompanya, defende no diskute ida-idak nia orçamento iha setor hotu-hotu ba desenvolvimento nasional iha tinan 2022.Nudar Ministru Petróleu no Minerais ne’ebé mak Institutu Petróleu no Geolojia (IPG) tutela ba, hau tenke halo esforsu “dentro das possibilidades do meu alcance” atu IPG alkansa ninnia objetivos ho metas trasadas inklui bele mai partisipa iha Seremonia Abertura ba Atividade IPG UPDATE ne’ebe ita hala’o iha ohin dia 14 to’o dia 15. IPG. I. P ou Instituto do Petroleo e Geologia. Institutu Publiku – nudar Institutu ida ne’ebé mak tutela ba Ministério Petroleo e Mienerais, hanesan mos ho Autoridade Petroleo e Mienerais (ANPM) no Timor Gap. E. P., no iha tempo besik (tinan oin) sei estabelese mos Kompania Mineiro Nasional ida.
IPG estabelese husi Estadu Timor Leste liu hosi Dekretu Lei n 33/2012 de 18 de Julhu 2012 ho nia objetivu prinsipal atu halo levantamentu dadus no estudu sièntifiku hodi produs informasaun jeolojika, armazenamento de dadus no jere informasaun kona-ba rekursus petroleo, gas no minerais inklui riskus jeolojikus no mos hidrojeolojia iha teritóriu Timor Leste tomak. Alem de ne’e, IPG mos hala’o k’nar hodi halo estudu no investigasaun inklui mos sai hanesan sentru rejistu no repozitóriu nasional ba informasaun sira relativamente ho rekursus jeolojikus iha Timor-Leste.
Objetivus Gerais MPM nian ne’ebe defini ona no espesifikamente ligadu ho IPG mak’a;
1. Promove peskiza ho estudu, identifikasaun no mapeamentu ba rekursus petróleu no minerais, riskus jeolojikus, akiferu no kualidade agua potavel;
2. Prepara no dezenvolve rekursus humanus nebe’e espesializadu iha setor petróleu, minerais no enerjias renovaveis.E nune’e mos iha prioridades annual MPM nian ba 2022 ne’ebe relasiona ho IPG mak’a;
1. Dezenvolvimentu institusional – Kontinua fo apoiu ba dezenvolvimentu ANPM-IP, TIMOR GAP E.P.no IPG-IP;
2. Estudu sistema petrolifera onshore no offshore, zona mineralizasaun rekursus metalikus, no identifikasaun rekursus naun-metalikus;
3. Identifikasaun potensia rekursu hidriku sub-terraneu, mapeamentu Jeolojiku, risku Jeolojiku no Jeo-tekniku;
4. Intalasaun core-storage facility no desenhu laboratoriu Jeolojiku;
5. Arendamentu no aquizisaun ba instalasaun edifisu MPM no instituisaun tuteladas (1º Edificio DFBC).
MPM nian objetivus ho prioridades ne’ebe defini ne’e atu hatudu katak Ministeriu iha kompromisu atu kontinua fornese apoio maximu ba Institusaun Tutelas hotu, inklui mos IPG, atu bele kumpri sira nian Objetivus e nun’e mos hodi atinji sira nian metas servisus. Nudar Ministru ne’ebe responsavel ba Institutu Petroleo e Jeologia, hau orgulho ba atividade IPG UPDATE ne’ebe IPG realiza ba loron 2 hodi atualiza sira nian servisu e nune’e mos divulga infomasaun sientifiku relasiona ho Petroleo e Jeolojia. Espera katak atividade ida ne’e sei fo benefisius ba parte interessada hotu hanesan linha ministerial relevante sira seluk, agensia naun-govermental, estudantes, sosiedade, komunidade no partisipante sira hotu. Hau mos hakarak enkoraja partisipantes sira hotu em geral no em partikular komunidade akademiku Faculdade de Engenharia, Ciencias e Tecnologia – UNTL (docentes no estudantes) em espesial Kursu Engenharia Geologia e Petroleo bele partisipa ho masimu no entusiasmo atu bele konyese diak liu tan IPG e nune’e mos hatene diak liu tan sira nian servisus hotu. Tamba komunidade akademiku tenke atualiza nafatin informasoens de karater konhesimento akademiku hodi hadaet ba ema seluk, kuantu mais hetan informasaun ho karater konhesimento akademiku nee ema bolu Matenek Nain.
Durante nee, iha Ministerio Petroleo no Minerais ho instituisoens tutelas sira laiha alumni husi FECT-UNTL, foin rekruta ida ka rua deit ema protesta dehan presidente IPG ho ministro halo KKN. Nebe Kursu Engenharia Geologica e Petroleo – FECT, labele orgulho ho naran Universidade Publika deit. Tenke hakaas aan atu bele compete iha publiku ba kampu de trabalho ho kompetensia rasik hanesan kompetensia akademiku nomos kompetensia professional nebe ita prepara komessa agora.Hau nian apresiasaun bo’ot ba Presidente IPG, Vice IPG no estrutura IPG tomak ba imi nian servisus mak’as durante ne’e hodi ikus mai bele realiza atividade ida ne’e, ho garantia ida ke sempre konta ho MPM nia apoio tomak. E espera atividade ida ne’e bele sai momentum diak ida hodi divulga habo’ot liu tan ba publiku Timorense IPG nian servisus hotu. Ho ida ne’e hau loke atividade IPG UPDATE ba tinan 2020-2021.
