Covalima-Suai, Kinta-Feira, 26/Maiu/2022-Ministru Petróleu no Minerais, Dr. Victor da Conceição Soares, akompanha diretamente husi Diretor Jeral MPM, Dr.Manuel Lemos no Prezidente IPG, Eng. Gabriel Apáricio, hamutuk ho ekipa Tékniku husi Ministériu Petróleu no Minerais (MPM), Autoridade Nasional Petróleu no Minerais (ANPM), Timor Gap no Institutu Petróleu no Geologia (IPG), halao vizita servisus iha Munisipiu Covalima-Suai.
Objetivu husi visita servisus refere, hodi observa direta edifisiu foun Ministériu Petróleu no Minerais nian iha Suai, no akompanha progresus atividades perfurasaun petróleu husi Timor Resources iha posus Feto-Kmaus no Liurai, atividades investigasõens téknikas husi Institutu Petróleu no Geologia iha Covalima, no atividades Timor Gap ligadu ho Projetu Tasi Mane no mos vizita ba terrenu edifisiu baze ba Timor Gap.
Durante halao vizita servisus ba iha posus Feto-Kmaus no Liurai ne’ebé mak sai nu’udar sítiu perfurasaun petróleu mak Empreza Timor Resources halao, Ministru Petróleu no Minerais, Dr. Victor da Conceição Soares, akresenta katak, ” Hafoin lansamentu perfurasaun iha posu Feto-Kmaus, seidauk iha infomasõens klaru no mosu informasõens ne’ebé mak la kredibel hodi públiku konsume, tan ne’e Ministru Petróleu no Minerais ho komitiva tomak, mai halao vizita servisus ne’e, hodi hare no observa direta, hodi koalia ho Dirijente, Tékniku no ekipa servisu iha empreza Timor Resources, ne’ebé mak involve direta iha atividade perfurasaun ne’e, hodi hetan informasaun ida klaru, hodi bele informa no komunika ba públiku”.
Ministru Petróleu no Minerais mos sublinha liu tan katak, ” Wainhira halao vizita servisu primeiru ba iha sítiu perfurasaun posu Feto- Kmaus, no simu informasaun ne’ebé mak fo sai husi pesoal tékniku ANPM no Dirijenti Empreza Timor Resources katak, estatutu husi posu Feto- Kmaus ne’e, tama ona ba faze “abandoned plague” no ho karater permanente, katak taka ona atividade sira iha fatin refere ho permanente, ne’e katak laiha tan ona atividade iha fatin refere, tamba razõens téknika balun, ne’ebé mak halo Timor Resources labele kontinua”. Maibe fatin refere konsidera hanesan furu de explorasaun, tamba hetan ona informasõens, dadus no estrutura jeolojíka, hodi muda fali ba segundu furu de esplorasaun iha posu liurai.
Iha posu refere, perfurasaun mos tama ona ba tarjetu perfurasaun, hodi hetan ona dikobrementu téknika, ne’ebé mak dadaun ne’e ekipa Timor Resources halo tan analísa balun hodi kontinua ba komersial diskobrementu liu husi sampel ne’ebé mak hetan, no sei halo tan analísa, hodi bele hatene katak ninia diskobrementu ne’e iha valor komersial ga lae, hodi taka provisoriu atu kontinua tan ba prosesu “well test”, atu nune’e bele konfirma diskobrementu komersial husi posu Liurai ne’e.Ministru Petróleu no Minerais, Dr. Victor da Conceição Soares, apresia no fo obrigado ba esforsu tomak, mak durante ne’e halao ona husi ekipa Timor Resources hamutuk Eastern Drilling Limited no koopera ho ANPM.
Parte Timor Resources mos sublinha katak, ” Dadaun ne’e dismobiliza ona ekipamentus no halo ba pakote ona, hodi hein desizaun hodi halao fali atividade perfurasaun iha etape tuir mai ba posu Lafaek ou lae posu Rusa iha Same”. “Maibe empreza dadaun ne’e infrenta kondisõens balun katak, dalan ne’ebé mak ladun diak, hodi difikulta ekipamentus hirak ne’ebé mak ho dimensaun bo’ot liu, la diak, tan ne’e mak Manajementu husi Empreza sei halo hela diskusaun téknika, hodi prepara ba priensi etapa servisus tuir mai”.Country Manager Timor Resources, Sr. Filomeno de Andrade, akresenta mos katak, ” Perfurasaun posu Feto-Kmaus ami halo deit to’o 660 metrus, no para iha ne’eba, tamba iha fraturasaun iha estrutura jeolojíka iha posu refere, no difisil atu kontrola, tamba mina no gas bele sai iha fatin bar-barak, prosesu perfurasaun ne’e fou-foun iha 351 metrus ba 400 metrus, hetan “gas kick” tmba presaun gas makas teb-tebes, konsege kontrola, maibe wainhira prosesu perfurasaun ne’e kontinua ba oin, persistente ho gas kick ne’e, balun bo’ot no balun kiik, maibe persistente nafatin ba to’o iha 660 metrus, tan ne’e mak Manajementu empreza desidi diak liu tenki halo estudu klean liu tan, hodi bele kontinua halo perfurasaun to’o tarjetu 1.040 metrus ga lae, tan ne’e mak desidi opsaun ida ne’e pendente lai, hodi kontinua fali mai iha prosesu perfurasaun ba posu Liurai”. No iha prosesu perfurasaun iha posu Liurai katak iha deskoberta, no kuantidade konfirmadu katak iha, maibe atu hatene katak iha kuantidade komersial, tenki liu tan husi prosesu teste.
Hafoin konklui vizita servisus ba iha posus Feto-Kmaus no Liurai, Ministru Petróleu no Minerais, Dr. Victor da Conceição Soares ho komitiva, kontinua vizita ba posu Lafahek no ba terrenu edifisiu baze ba Timor Gap, konklui ho halao observasõens iha formasõens jeolójikas ne’ebé mak karaterizadas ba sistema petrolíferu Timor iha idade pérmisu to’o kretássiku iha aréa Hoges, Covalima-Suai.
Ministru Petróleu no Minerais, Dr. Victor da Conceição Soares, hamutuk ho komitiva, no akompanha direta husi Komandante Munisipiu Covalima, Superintendente Basilio de Jesus ho ekipa PNTL Munisipiu Covalima, halao mos vizita ba iha Postu Integradu iha aréa fronteira entre Salele ho Indonesia, hodi rona perkupasõens, dezafius no difikuldades ne’ebé mak durante ne’e infrenta husi ekipa Alfandega, Servisu Migrasaun no UPF-PNTL mak halao kna’ar iha aréa refere, hodi asegura funsionamentu sevisus atendementu iha fronteira ne’e, liu-liu fasilidades ne’ebé mak sei falta no balun ne’ebé hahu’u at ona, atu nune’e Ministru Petróleu no Minerais bele akumula informasõens pertinente hirak ne’e, hodi hato’o ba Ministériu relevantes, atu bele tau iha konsiderasaun, hodi bele responde nesesidades ekipa refere, atu nune’e bele hadiak liu tan atendementu iha Postu Integradu, fronteira ho nasaun Indonesia ne’e.
