DÍli, Segunda-Feira, 13/Junhu/2022-Ministru Petróleu no Minerais Dr. Victor da Conceição Soares, halao reuniaun kortejia ho Prezidente Konsellu Administrasaun nu’udar mos Managing Diretor ba Kompanhia Santos, Sr. Kevin Gallagher no Komitiva.
Hafoin enkontru kortejia ne’e, liu husi intrevista ho ekipa media sira, Ministru Petróleu no Minerais Dr. Victor da Conceição Soares akresenta katak, ” Reuniaun kortejia ne’e hodi aserta kestõens balun entre Santos no Governu Timor-Leste kona-ba asuntu Bayu Undan nian, ne’ebé mak pontu primeru ohin diskuti kona-ba produsaun, mak tama ona iha faze ida dekliniu katak atu besik hotu ona, maibe ohin Santos kompromete katak sei kontinua halo esforsu máximu, hodi valoriza ita nia rekursu hirak ne’ebé iha Bayu Undan ne’ebá, no ba futuru mos Santos sei kontinua apoiu Timor-Leste liu fali husi Bloku seluk ne’ebé mak sira manan ona, no pontu segundu diskuti kona-ba decommissioning no wainhira Bayu Undan tama ona ba iha faze fim da vida util, mak sei servisu hamutuk ho ANPM kona-ba CCS (Carbon Capture and Storage) ka armazenamentu karbonu, agora dadaun sei iha hela faze estudu, no precizamente sei diskuti tan hodi kria Leis no Regulamentus relasiona ho CCS ne’e, no sei kontinua servisu hamutuk ho ANPM nu’udar Regulador, atu nune’e bele máximiza liu tan esforsu hotu mak Santos halo, atu bele kontinua apoiu Timor-Leste iha área hirak ne’ebé mak preciza ba longu prazu”.
Iha fatin hanesan, Prezidente Konsellu Administrasaun nu’udar mos Managing Diretor ba Kompanhia Santos, Sr. Kevin Gallagher, realsa katak, ” Senti kontente bele mai iha Timor-Leste no agradese ba apoiu husi Ministériu Petróleu no Minerais no ANPM, tamba bele asegura Santos bele asume nu’udar operador ba Bayu Undan, no investimentu ba perfurasaun mina matan tolu ne’ebé mak hetan apoiu husi Ministériu Petróleu no Minerais ho ANPM, hosi extende liu tan produsaun Bayu Undan nian, no Santos mos iha hanoin ona hodi investe ba Bayu Undan, kona-ba CCS (Carbon Capture and Storage) ka armazenamentu karbonu, ne’e nu’udar projetu ba durasaun tinan 20 no karik bele to’o tinan 30, no alemde ne’e, ba produsaun Bayu Undan ne’ebé mak besik hotu ona, preciza desmantela fasilidades balun ne’ebé mak hanaran decommissioning, ne’e ita sei halao servisu hodi máximiza konteudu lokal, hanesan oportunidade ba Timor-oan sira hodi servisu ka bems servisu ne’ebé mak mai husi Timor-Leste”.
Reuniaun kortejia refere halao iha sala reuniaun Ministériu Petróleu no Minerais, no Ministru Petróleu no Minerais akompanha diretamente husi Diretor Jeral MPM, Dr. Manuel Lemos, Xefe Gabinete MPM, Sr. Valente Ferreira, M.Sc, Prezidente ANPM, Engº. Florentino Mateus Soares Ferreira no Sekretária Exekutiva MPM, Engª. Regina Rodrigues no husi parte Santos nian, CEO Santos, Sr. Kevin Gallagher akompanha diretamente husi Prezidente Midstream no Clean Fuels, Sr. Brett Woods, Prezidente Upstream Oil and Gas, Sr. Bret Darley, Vise Prezidente Upstream Northern Australia and Timor-Leste, Sr. Jhon Chambers, Head of Government Affairs, Sr. Robert Malinauskas, Timor-Leste Country Manager Santos, Sr. José Lobato Gonçalves no External Relations Officer Commercial, Sr. David de Araujo.
