𝐌𝐈𝐍𝐈𝐒𝐓𝐑𝐔 𝐏𝐄𝐓𝐑Ó𝐋𝐄𝐔 𝐍𝐎 𝐌𝐈𝐍𝐄𝐑𝐀𝐈𝐒 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 Â𝐌𝐁𝐈𝐓𝐔 𝐖𝐎𝐑𝐊𝐒𝐇𝐎𝐏 𝐎𝐍 𝐆𝐄𝐎-𝐇𝐀𝐙𝐀𝐑𝐃 𝐒𝐈𝐓𝐔𝐀𝐓𝐈𝐎𝐍 𝐈𝐍 𝐓𝐈𝐌𝐎𝐑-𝐋𝐄𝐒𝐓𝐄, 𝐌𝐀𝐊 𝐎𝐑𝐆𝐀𝐍𝐈𝐙𝐀 𝐇𝐔𝐒𝐈 𝐈𝐏𝐆

Ministru Petróleu no Minerais, Dr. Victor da Conceição Soares, partisipa iha âmbitu Workshop On Geo-Hazard Situation In Timor-Leste, ne’ebé mak organiza husi Institutu Petróleu no Geologia, no aumesmu tempu halo abertura ba Workshop refere iha salaun City 8, Díli.

Workshop ne’e halao ho tema : ” 𝙏𝙞𝙢𝙤𝙧-𝙇𝙚𝙨𝙩𝙚 𝙎𝙚𝙞𝙨𝙢𝙞𝙘 𝙉𝙚𝙩𝙬𝙤𝙧𝙠 𝙊𝙗𝙨𝙚𝙧𝙫𝙖𝙩𝙞𝙤𝙣 𝘼𝙣𝙙 𝙈𝙤𝙣𝙞𝙩𝙤𝙧𝙞𝙣𝙜 𝙎𝙮𝙨𝙩𝙚𝙢 “, nu’udar meiu ida husi tékniku sira iha Divizaun Risku Geolójíku IPG nian, hodi disemina informasaun téknikas relasiona ho risku husi dezastres naturais wainhira akontese iha Timor-Leste.IPG servisu konjunta ho Entidades sira seluk, inklui estabelese mos kooperasaun ho Ajensia Internasional hanesan JICA husi nasaun Japaun, no liu husi parseria ne’e, JICA suporta ona IPG liu husi kapasitasaun ba Staff Tékniku sira IPG nian, inklui mos apoiu ekipamentus ba Divizaun Risku Geolójiku husi IPG.

Ministru Petróleu no Minerais, Dr. Victor da Conceição Soares, liu husi diskursu ne’ebé mak hato’o iha abertura ba Workshop refere, husu nafatin ba IPG atu identifika no kontinua buka koñese didiak Jeolojia Timor-Leste husi superfisie (rai leten) to’o sub-surfisie (rai-okos), pois ida ne’e, sei kontribui no auxilia Governu no Insituisaun relevantes sira hodi halo desijaun ba dezenvolvimentu ida ekonómikamente sustentável, infraestrutura kualidade no segura.

Maske nune’e, Ita rekoñese katak, preciza nafatin apoiu husi parseirus Internasionais sira hodi fo asistensia ba rekursu úmanu, inklui mos apoius fasilidades hodi utiliza ba peskiza, estudu no monitorizasaun ba Rai Nakdoko, tamba ne’e, hahu’u kedas iha tinan 2018, JICA fo asistensia ba IPG liu husi dezenvolvimentu rekursu umanu ba funsionárius no téknikus sira, hodi fo formasaun kurtu prazu no hasai mestradu iha área espesialidade sira hanesan Rai Nakdoko, Risku ba dezlizamentu rai, no apoia ekipamentu monitorizasaun hanesan Estasaun Rede Sízmika no Acelerômetros de Movimento Fortes (SMA) hodi estabelese iha teritoriu Timor-Leste, akresenta Ministru Petróleu no Minerais.

Iha okaziaun ne’e, Ministru Petróleu no Minerais Dr. Victor da Conceição Soares hamutuk ho Vise Prezidente Institutu Petróleu no Geologia, Eng. Oktoviano Tilman de Jesus, Diretor Geological Risk husi IPG, Eng. Eugenio Soares, no akompanha husi Prezidente Autoridade Protesaun Civil, Reprezentante husi JICA, Reprezentante husi Mercy Corps halao lansamentu ba Sistema monitorizasaun ba rai nakadoko no tsunami, ne’ebé mak hetan suporta finansial husi JICA iha Timor-Leste.