𝗠𝗜𝗡𝗜𝗦𝗧𝗥𝗨 𝗣𝗘𝗧𝗥𝗢́𝗟𝗘𝗨 𝗣𝗔𝗥𝗧𝗜𝗦𝗜𝗣𝗔 𝗗𝗘𝗕𝗔𝗧𝗘 𝗣𝗥𝗢𝗚𝗥𝗔𝗠𝗔 𝗚𝗢𝗩𝗘𝗥𝗡𝗨 𝗞𝗢𝗡𝗦𝗧𝗜𝗧𝗨𝗦𝗜𝗢𝗡𝗔́𝗟 𝗗𝗔𝗦𝗜𝗔

Ex.cia Ministru Petróleu, Francisco da Costa Monteiro, Tersa-Feira ne’e, partisipa iha debate programa Governu Konstitusionál dasia iha Parlamentu Nasionál.

Iha aprezentasaun, Primieiru-Ministru, Kay Rala Xanana Gusmão introduz programa prioritáriu governu nian ba loron 120, foku exekutivu nian ba tinan lima, ne’ebé inklui mos indústria petrolífera iha Kosta Súl, hodi fó efeitu multiplikadór ba munisípiu hotu.

“Implementasaun ba Tratadu Fronteira Marítima entre Timor-Leste ho Austrália iha Tasi Timor, sai nudar prioritáriu ba Exekutivu ida ne’e, hanesan mós atu lori kadoras explorasaun Greater Sunrise nian, mai Kosta Sul Timor-Leste. No, atu garante efisiénsia boot liu iha setor ida ne’e, ami sei halo reestruturasaun imediata iha Diresaun TIMOR GAP no ANPM” Tenik Xefe Governu.

Tuir Xefe Governu, kadoras mai Timor-Leste mak solusaun viável no segura ba ekonomia Timor-Leste nian iha futuru.

“Dezenvolvimentu Kosta Súl nian, sei sai sentro ba atividade, iha setor petróleu no gás natural, ho estabelesimentu baze logístika iha Suai, hanesan mós refinaria petrolífera ida no mós komplexu petrokímiko iha Kosta Sul no instalasaun fábrica gás natural liquefeitu, gás ne’ebé sei mai husi Greater Sunrise, liu husi construsaun gazodutu, husi tasi okos, to’o Rai maran,” Fundamenta Kay Rala Xanana Gusmão.

Industria Petrolífera ne’e sei rezulta, kriasaun sidade foun, infrastrutura, kriasaun empregu diretu no indiretu liu rihun 50 no hamoris atividade ekonómika.

“la’os deit kona-ba aumento do Produtu Internu Brutu, maibé kona-ba dinámika ekonómika ne’ebé fó ba produtividade husi fatór ekonómiku oioin, ne’ebé mós subkontratasaun servisu hanesan restaurantes, engeñaria, seguransa, fornesimento kombustível, servisu ba gestaun, profissionál no técniku sira no necessidade iha produtu agríkola – ne’e hotu atu menciona deit balun” Argumenta.

Debate loron dahuluk programa exekutivu nian, partisipa máximu husi deputadu no membru governu konstitusionál dasia.