𝐌𝐏𝐑𝐌 𝐀𝐏𝐑𝐄𝐙𝐄𝐍𝐓𝐀 𝐏𝐑𝐎𝐏𝐎𝐒𝐓𝐀 𝐎𝐑𝐒𝐀𝐌𝐄𝐍𝐓𝐔 𝐑𝐄𝐓𝐈𝐅𝐈𝐊𝐀𝐓𝐈𝐕𝐔 𝐊𝐎𝐌𝐈𝐒𝐀𝐔𝐍 𝐑𝐄𝐕𝐈𝐙𝐀𝐔𝐍 𝐎𝐑𝐒𝐀𝐌𝐄𝐍𝐓𝐔

Sua Eselénsia Ministru Petróleu no Rekursus Minerais, Francisco da Costa Monteiro, Sábadu fim-de-semana ne’e, aprezenta proposta orsamentu retifikativu ba Komissaun Revizaun Orsamentu, kona-ba finansiamentu nesesidade ministériu no instituisaun tutela sira durante fulan hirak mai.

Aprezentasaun ne’ebé realiza iha Ministériu Finansas, lidera husi Sua Eselénsia Primeiru Ministru, Kay Rala Xanana Gusmão, konta ho partisipasaun husi Vise-Primeiru Ministru na’in rua, Sua Eselénsia Francisco Kalbuady Lay no Sua Eselénsia Mariano Assanami Sabino no membru governu sira.

Sua Esélensia Ministru Francisco da Costa Monteiro deklara ba jornalista sira katak, publiku bele hatene dotasaun ba seitór petróleu no minerais, hafoin Konsellu Ministru konfere proposta sira no ekamiña ba Parlamentu Nasionál.

“Ita labele dehan ninia numeru, mais o que certo, ami presiza osan balun hodi re-estabelese negosiasaun Greater Sunrise ninian, permite ita finaliza finaliza Petrolium Mining Code, Tax Regime, Production Sharing Contract, atu finaliza dokumentu tolu ne’e, presiza servisu lubuk ida, envolve despeza lubuk ida, liu-liu lori ekipa teknika, legais sira, ekipa komersias sira para bele halo sevisu,” Fundamenta Sua Esélensia Ministru Francisco da Costa.

Orsamentu ne’ebé atu aloka ba Ministériu Petróleu no Rekursus Minerais sei finansia re-avaliasaun ba implementasaun ba projektu Tasi-Mane, servisu operasionál no mos subsídiu ba TIMOR GAP, IPG no instituisaun tutela seluk.

“Ministériu Petróleu tau kestaun negosiasaun Greater Sunrise hanesan prioridade no mos atu dudu maka’as explorasaun mina no gas iha rai-maran Kosta Súl ne’ebá hanesan iha Suai, Betanu no fatin sira seluk,” Konklui Eselénsia Ministru Petróleu no Rekursus Minerais.